The Quake : تعمل ايه لو انت الوحيد اللي عارف أن الكارثة هاتحصل؟!
ساعات بتيجي علينا لحظه بنكون عارفين أو متوقعين أن مشكلة كبيرة هاتحصل حوالينا. لكن ماحدش بيكون مقتنع أو مصدق في توقعاتنا. الموضوع ده ممكن يعدي على المستوى الشخصي أو البسيط. لكن لو كانت الكارثة عبارة عن زلزال مدمر. ساعتها النتائج بتكون كارثية.
فيلم The Quake بيحكي عن موجة زلازل مدمرة بتلاحق مدينة أوسلو. وبيحاول خبير الزلازل كريتسوفر جونر أو كريستيان إكورد النجاة مع أسرته من الزلزال.
الأداء التمثيلي كان متميز. وتوجيهات المخرج جون أندرياس أندرسن كانت واضح أن لها نتيجة قوية جدا منعكسة على أداء الممثلين. لكن من ناحية تانيه ممكن بعض المشاهدين يشعروا بالملل خاصة في الجزء الأول من الفيلم نتيجة تأخير المشاهد الخاصة بالزلزال.
لكن من ناحية تانيه صالحنا المخرج بمشاهد زلزال قوية وخاصة مشاهد انهيار المباني اللي تم تنفيذها بحرفية كبيرة على مستوى المؤثرات الخاصة والخدع اللي منغيرها الفيلم كان ممكن يفشل جدا.
أسلوب التصوير الخاص بالفيلم كان ممتاز واختيار زوايا التصوير بشكل متناسب مع الخدع السينمائية والفنية كان أكثر من رائع.
The Quake فيلم كوارث ممتاز هايعجب محبي الأفلام اللي بتناقش الكوارث الطبيعية اللي هايلاقوه فيلم قادر على حبس أنفاسهم.
