The Queen’s Corgi : دونالد ترامب في فيلم أنيميشن للأطفال؟!
بيعجبنا أفلام الانيميشن القادرة على الموازنة بين أنها موجهة للأطفال وبين أنها تعجب وتشد انتباه الكبار كمان. لكن هل نجح فيلم The Queen’s Corgi في الموازنة دي؟!
The Queen’s Corgi بيحكي عن (ريكس) – واللي بيقوم بالأداء الصوتي له جاك وايتهول-الكلب المرفه اللي بيعيش حياة فاخرة جدا يمكن مش متاحة لبعض البشر. لكن الظروف بتخليه ينتقل للحياة في ملجأ للكلاب المشردة. علشان يكتشف وجه جديد من الحياة مكانش متعود عليه. هل هايقدر ينجو؟
أهتمام الفيلم كان متركز بدرجة كبيرة على المشاهد اللي بيظهر فيها دونالد ترامب واللي قام بالأداء الصوتي له جون كالشو. والحقيقة أن جون قدر يتقمص الشخصية بشكل مثالي.
لكن في الحقيقة الخيط بتاع دونالد ترامب يعتبر مناسب أكبر للمشاهدين الكبار، بدون أي اعتبار للمشاهدين الأصغر سنا، حتى أننا بنشوف مشهد قصير جدا لزجاجة كوكاكولا بيتم وضعها للرئيس ومكتوب عليها غلطة املائية من اللي مشهور بيهم ترامب في كلامه على موقع تويتر. هل يمكن يكون المشهد ده موجه لطفل صغير؟!
الفيلم كان أحيانا بينسى “الموازنة” اللي كان المفروض تكون موجودة وكان بينحاز شويه للمشاهدين الكبار وشويه للمشاهدين من الأطفال. والنتيجة النهائية في رأينا كانت إحباط للطرفين!
لا يمكن ننكر أن الفيلم كان فيه مشاهد جيدة لكن القوة الحقيقية للفيلم كانت نابعه من السيناريو وتقلباته وفكرة الانتقال من حياة مرفهة لحياة صعبة. ودي حبكة بيطلع منها كوميديا متميزة طول الوقت مش بس في حالة The Queen’s Corgi
فيلم The Queen’s Corgi حاول يلعب على الموازنة بين أنه يكون ممتع للصغار وفيه اسقاطات سياسية للكبار. لكن للأسف فشل في الحالتين وسابنا مع بعض الكوميديا وحبكة جيدة.
