The Royal Treatment: مافيش أي جديد.. بس احنا مبسوطين!
ناس كتير في مصر مالهاش في الكورة، لكن مجرد ما تعرف أن محمد صلاح بيلعب في نادي معين، أو هايلعب مباراة قريب، بيهتموا يدعموه ويقفوا وراه. لأننا بنتحيز لكل ما هو مصري. وده اللي خلانا نتابع فيلم The Royal Treatment علشان نشوف الكندي من أصل مصري (مينا مسعود) هايعمل ايه. علشان يخلينا مبسوطين!
مسعود بيقدم دور الأمير توماس، اللي بيتعرف بالصدفة على مصففة شعر نيويوركية جميلة (لورا مارانو في دور ايزابيلا) واللي بتعاني من مشاكل مادية بتنغص عليها إدارة صالون التجميل بتاعها، لحد ما تتعرف على الأمير اللي بيقرر يستعين بخدماتها مقابل مبلغ خيالي علشان تصفف شعر حضور حفل الزواج الملكي الخاصة به. ويخلي كل اللي يحضروا الزفاف مبسوطين!
هل محتاجين نكمل قصة The Royal Treatment يعني هل محتاجين نقول لك أن (ايزابيلا) هاتغير حياة توماس، وتخليه يقتنع أنها الحب الحقيقي في حياته مش البنت اللي هايتجوزها ومش بيحبها؟ هل محتاجين نقول لك عن الصعوبات اللي هاتواجها قصة الحب، مابين صعوبات في اختلاف المستوى المادي والاجتماعي بين الأمير والكوافيره، ومكائد أم الزوجة المستقبلية للأمير؟ كل دي تيمات (محروقه) في مليون فيلم وقصة تانيين. لكننا برضو لسه مبسوطين!
مبسوطين علشان نتقليكس في فيلمها اللي يعتبر انتاج حصري لها قدمت لنا صورة جميلة جدا، مع قصة مش محتاجه تشغيل مخ أو ذكاء. مع ممثلين روحهم خفيفه على الشاشة ووجوههم جميلة قدام الكاميرا (خصوصا لورا مارانو) كل ده بيتم تصويره في أماكن رائعة الجمال مع لمسة كوميديا وروح شبابية. كل ده فكرنا بوجبات الفاست فوود، أكل تقليدي لكن المنظر العام و (الحشو) هو اللي بيعطيه قيمه ويخلينا ناكله واحنا… مبسوطين!.
الجميل في The Royal Treatment أنه بيقدم الصورة النمطية عن البنت الفقيرة اللي بيصحبها الأمير للمجد بفلوسه ونفوذه لكن المرة دي بطريقة معكوسة. من خلال أنه يورينا أن تلقائية ايزابيلا وروحها الجميلة وطاقتها الإيجابية هي اللي أنقذت الأمير من حياته التقليدية الرخمة أو حتى من المؤامرات اللي بيتم تدبيرها ضده. لكن بصراحه ماينفعش ندي The Royal Treatment ابعاد فلسفية أكتر من كده. لأنه في النهاية كل المطلوب منه أن المشاهدين يتفرجوا عليه ويقوموا.. مبسوطين!
فيلم The Royal Treatment يصلح للمشاهدة في الليالي اللي بتبقوا عاوزين تتفرجوا فيها على فيلم ما يحتاجش منكم ذرة من تشغيل دماغ.. بعد يوم شغل ممل وطويل ومرهق. أو لما مودكم يكون وحش ومحتاجين عمل درامي يشتغل في خلفية دماغكم يخليكم… مبسوطين!