The Second Best Exotic Marigold Hotel : الملل يتجسد فى فيلم!
على الرغم من البوستر اللى بيوعد بحاجات كتير.. الاعلان المتميز، الاغاني الهندية والموسيقي الراقية والديكورات المختلفة واسماء الابطال الكبيرة الا ان الفيلم كان ممل لدرجة اننا فكرنا نهرب من قاعة العرض فى استراحة الفيلم.. وشجعنا هروب بعض المشاهدين، لكننا قولنا نكمل للاخر ونشوف ايه اللى ممكن يحصل.
من اخراج جون مادن بنشوف مجموعة من القصص المتداخلة والمترابطة ببعضها البعض من خلال استعراض قصص بعض النزلاء فى احد الفنادق المخصصة للعجزه، واللى بيحصل فيها بعض المواقف المفروض انها كوميدية من خلال التصرفات الغبية للبطل ديف باتل، او من خلال المواقف الرومانسية اللى بتحصل بين العجائز بعضهم البعض وعلى رأسهم ماجي سميث، جودي دنش، وسيليا امري وغيرهم.
على الرغم من اننا لما كتبنا قصة الفيلم حسينا انها ممكن تكون مغرية شوية، لكن تنفيذها على الشاشة لم يكن بنفس قوة كتابتها. اداء الابطال كان ثقيل الظل على الرغم من محاولات الكوميديا اللى قدمها ديف باتل واللى تراوحت بين السخرية من شكله او طريقته فى الكلام واسترساله فى حوارات تافهه او تاكيده على وجود ضيوف الفندق يوميا لضمان عدم موت احدهم!
جودي دنش بتقدم دور مختلف عن دورها فى سلسلة افلام جيمس بوند الاخيرة كمديرة للاستخبارات البريطانية (ام) واللى بتظهر فيها بشخصية حاسمة وقوية وصعبة المراس، لكن دورها فى فيلم اليوم كان اكثر نعومة وان جاء ادائها له بشكل ضعيف ومصطنع احيانا.
الموسيقي التصويرية كانت تعتبر من نقاط قوة الفيلم، باستعراضات هندية جميلة وجمل موسيقية هندية برضو دخلتنا للجو العام للفيلم بسهوله واثارة، وظبطنا نفسنا اكتر من مره بنحاول ندور على موسيقي الفيلم للرجوع لتيمة معينة او مقطع محدد.
الديكورات ايضا كانت قوية، وتنوعت بين التصوير الخارجي والداخلى بقوة على حد سواء، فقط لو كان التمثيل اقوي والقصة اكثر اثارة وفيها حبكه عن كده شوية كان ممكن يكون الفيلم اكثر من ممتاز.
The Second Best Exotic Marigold Hotel : فيلم تدخله لو بالك رايق وطويل وعندك وقت وتركيز قادر على بذلهم فى الفيلم، لكن لو كنتم من محبى الافلام اللى فيها (رشة شطه).. ننصحك تنتظر فيلم اخر.
