The Shape of Water: أطلق العنان لخيالك

روتين الحياة اليومية ممكن يقتل جوانا حاجات كتير جميله. لكن ده مش هايتم الا لو استسلمنا له وتركناه يقتل بداخلنا أهم وأحلى شيء.. الخيال.. تعالوا نتعرف أكتر على The Shape of Water واللي بيحكي عن نفس الفكرة.

القصة

The Shape of Water بيحكي عن سيدة بسيطة بتعيش حياة نمطية متكررة يوميا من خلال العمل في أحد المعامل السرية في فترة الحرب الباردة بين روسيا والولايات المتحدة. لكن الحياة النمطية دي بيتم نسفها تماما لما بتتعرف على كائن خرافي غريب بيتم صناعته في المختبر السري. لكن هل هاتستمر الحياة بنفس رتابتها بعد وجود المخلوق ده؟!

فريق العمل

الفيلم من اخراج جييرمو ديل تور وتأليف دانيال كروس ومن بطولة سالي هوكينز و مايكل شانون و مايكل ستولبيرج و أوكتافيا سبنسر

الأداء التمثيلي

الأداء التمثيلي لأبطال الفيلم كان جيد ونخص هنا بالذكر سالي هوكينز واللي قدرت تقدم أداء تمثيلي أسطوري ورائع، وقدرت توصل لنا مشاعرها بنظرات عينها وحركات ايدها وجسمها. سارة هوكينز ممثلة عبقرية ومتمكنة من أدواتها الى اقصى وأفضل الدرجات وده شيء يحسب لها بالمقام الأول والأخير.

السيناريو والحوار والأخراج

سيناريو الفيلم قوي ومتماسك خاصة في النصف الأول من الأحداث، كمان الحوار الخاص بالفيلم بيتم توظيفه بذكاء لخدمة أغراض الفيلم، وكل ده في النهاية إن دل، يدل على تمكن المخرج وقدرته على اللعب الجيد بأدواته واستغلالها الاستغلال الأمثل علشان يقدم في النهاية فيلم ناجح وممتع.

الديكورات والموسيقى والأزياء

ديكورات الفيلم والموسيقى التصويرية الخاصة به  كانت أكتر من رائعة، ونقلتنا لزمن أحداث الفيلم بسهولة وبدون شعورنا بأي اختلاف أو تمايز بين كل مشهد من مشاهد الفيلم. بل على العكس شعرنا في كل مشهد من المشاهد بحالة من الانسجام والجمال والتناغم بين الأحداث والديكورات والموسيقى التصويرية الأكثر من رائعة.

الخلاصة

فيلم The Shape of Water فيلم جميل ويحفزنا على إطلاق خيالنا والانتصار على روتينية وثبات الحياة اللي بيعيشنا ناس كتير منا.

علشان تبقى عارف:

تقييم الفيلم على موقع IMDB 7.7 من 10