The Sisters Brothers : مغامرة مختلفة في الغرب الأمريكي
فترة طويلة مرت علينا بدون ما نتفرج على فيلم ويسترن أمريكي. بالتالي انتظارنا لفيلم The Sisters Brothers كان على أحر من الجمر. خاصة أن مخرج الفيلم جاك أوديار الفرنسي الأصل واحد من المخرجين اللي قدموا أفلام قوية ومهمة زي Dheepan و A Prophet وغيره من الأفلام القوية. كمان هو شارك في كتابة سيناريو الفيلم اعتمادا على رواية توماس بيديجاين. والحقيقة أن انتظارنا كان في محله وده اللي ها نناقشه معاكم في السطور القادمة.
The Sisters Brothers بيحكي عن فترة من فترات الغرب الأمريكي، واللي انتشر فيها جنون التنقيب عن الذهب. وفي وسط كل الأحداث دي بنشوف قصة متشابكة عن منقب عن الذهب (قام بدوره ريز أحمد) بيكتشف مادة قادرة على تغيير شكل التنقيب عن الذهب الى الأبد، لكن في نفس الوقت بيتتبعه اتنين من القتلة المأجورين (خواكين فينيكس و جون سي رايلي) بسبب السر اللي معاه.
لما نيجي نتكلم عن فيلم بيضم ممثلين زي جيك جيلنهال و خواكين فينيكس و جون سي. رايلي و ريز أحمد فا أحنا بنتكلم عن فريق تمثلي متميز. ولما تجتمع العناصر دي مع قصة مقتبسة عن رواية وسيناريو مكتوب بحرفية، إحنا تقريبا بنتكلم عن واحد من أحسن الأفلام اللي شوفناها مؤخرا. لكن هل معنى كده أن الفيلم بلا عيوب؟
الحقيقة أن واحد من أهم مشكلات الفيلم كانت شعورنا بالملل خاصة خلال الربع الأول من الأحداث. أو تحديدا لحد ما بنبدأ في اكتشاف الحبكة الأساسية للفيلم و حالة الاشتباك بين الأبطال وبين بعضهم البعض. ولأن المخرج فرنسي ومتعود على أعمال بتشارك في مهرجانات. كانت طريقة تقديمه للأحداث بطيئة شويه. لكن بعد كده الفيلم بياخد إيقاع جيد جدا ومتسارع.
من المميز في ديكورات الفيلم أنها قدرت تنقلنا زمنيا ومكانيا لفترة الأحداث. كمان اختيار الملابس والموسيقى التصويرية والمؤثرات الخاصة بإطلاق النار. كلها حاجات تم اختيارها بعناية شديدة علشان تنقل لنا تفاصيل عصر كامل ما حدش فيها عاشه لكن تابعناه كلنا على الشاشة.
The Sisters Brothers فيلم قوي ومميز وننصح بمشاهدته كل محبي أفلام الكوميديا السوداء وأفلام رعاة البقر والغرب الأمريكي.
