The Son of Bigfoot: مغامرة تعلمنا احترام الحيوانات

من الجميل اننا نشوف فيلم بيناقش مشكلة حقوق الحيوانات بطريقة ظريفة وغير مباشرة زي

The Son of Bigfoot. وعلى الرغم من أن الموضوع ده ممكن يكون مش مؤثر جدا في حياتنا في مصر، لكن من الجميل أننا نعلم أولادنا حماية الأصغر والأضعف منا حتى لو كان من خلال فيلم أنيميشن.

القصة

الفيلم بيحكي عن مراهق أمريكي بيقرر يخوض مغامرة كبيرة جدا علشان يعثر على والده الغايب بقى له فترة طويلة. لكنه بيكتشف أن والده نفسه ينتمي لفصيلة أسطورية أسمها (بيج فوت)، وإن فيه محاولات لصيده وإجراء تجارب عليه، ومن هنا بتبدأ المغامرة تاخد منعطف تاني.

فريق العمل

الفيلم من أخراج  جيريمي ديجروسون و  بين ستسن ومن تأليف  بوب بارلن و كال برنكر ومن بطولة الأداء الصوتي لـ كال برنكر و جوي كامين و جو توماس و بوب بارلن و ديفيد إبستاين

الأداء الصوتي

الأداء الصوتي للأبطال كان متميز جدا، خاصة صوت الشاب المراهق اللي تم أداؤه بشكل متميز ومريح للأذن. كمان حسينا أن كل شخصية من شخصيات الفيلم كانت بتسعى طوال الوقت أنها تخلينا نعيش شعورها من خلال صوتها، ودي مهمة مش سهلة حتى لو بانت بسيطة.

السيناريو والحوار والأخراج

سيناريو الفيلم كان بياخدنا من مفاجأة للتانية باحترافية ممتازة وبدون ما يتركنا ثانية واحدة للملل أو الشعور أن الأحداث مكررة. والحقيقة الأخراج نجح في المهمة بشكل كبير من خلال وجود عدد كبير من المواقف والمشاهد، واللي كانت الكوميديا فيها موزعة بين أنها تكون ناتجة عن كوميديا الموقف أو الأيفيهات الكوميدية.

الرسومات والموسيقى والتحريك

الرسومات في الفيلم كان كلها حيوية وانطلاق. كمان الأهتمام بتنوع الألوان على الشاشة كبير، وكلها كانت ألوان حارة ودافية وجميلة زي الأحمر والطوبي مثلا، وده ترك عندنا انطباع جيد طوال مشاهدة الفيلم. كمان تحريك الشخصيات على الشاشة تم بسلاسة وباحترافية عالية وكل دي أمور تحسب للفيلم وصناعه، لكن موسيقى الفيلم في رأينا كانت محتاجه تكون أفضل.

الخلاصة

The Son of Bigfoot فيلم جميل ومناسب للكبار والصغار على حد سواء.

علشان تبقى عارف: الفيلم من أنتاج بلجيكي