The Terror of Halloween : لما تضحك في فيلم رعب اعرف انه فاشل!
لما تكون بتتفرج على فيلم رعب من حقك تقتنع أو لا.. يعجبك أو لا.. لكن لو الموضوع قلب بضحك وحسيت أنك في فيلم كوميدي من النوع الرديء اعرف انك بتتفرج على فيلم فاشل!
The Terror of Halloween فيلم بيحكي عن شاب بيتعرض لمشاكل نتيجة تنمر مجموعة من الشباب عليه، وفي أحد الليالي بيقرر يتمنى أمنية أن العقاب يحل عليهم كلهم. وما كانش يعرف ان أمنيته هاتتحول لحقيقة مرعبة وهايكون له القدرة انه ينتقم بشكل سحري من أي حد يضايقه
القصة اللي كتبها وأخرجها تود تاكر مكررة وشوفناها في أفلام تانيه كتير. لكن الأسوأ من تكرار القصة هو (الخيبة) في تنفيذها. يعني بنشوف مؤثرات خاصة أقرب لمسرحيات الأطفال منها للمؤثرات الحقيقية. بالإضافة لأداء تمثيلي أكتر من ضعيف!
في بعض المشاهد بيحاول الفيلم يقدم لنا بعض المشاهد المرعبة من خلال ظهور كائنات أو اشخاص من جانب الكادر علشان نحس بالرعب. لكن حتى المشاهد دي كانت ضعيفه ومش هاتثير غير الضحك العصبي. وعلى الرغم من أن انتاج فيلم رعب مش محتاج في الغالب ميزانية كبيرة او خبرة كبيرة للمخرج لكننا مش عارفين ازاي انتهى الامر بصناع The Terror of Halloween انهم يقدموا العبث ده!
The Terror of Halloween فيلم من نوعية الأفلام اللي بتعرضها القنوات الفضائية في ساعات الصباح الأولى علشان تملى وقت بثها بأفلام يتابعها المتفرج بنصف أو ربع ذهن.
