The Turning : الفيلم ده هايجيب لكم إحباط!
من فترة طويلة نسبيا أصبح عندنا شعور أننا مش هانشوف فيلم رعب قادر يبهرنا. في وسط استسهال معظم صناع أفلام الرعب بتقديم حبكات مُكررة وأفلام شبه مقتبسة عن قصص (أتهرست) في ألف فيلم قبل كده. لكن المُختلف اللي قدمه صناع The Turning هو أنهم فشلوا في تقديم الصورة النمطية دي كمان!
The Turning بيحكي عن مُربية أطفال بيتم تعيينها علشان ترعى طفلين في منزل ضخم بيمتد على مساحة كبيرة. وبمجرد استقرارها في المنزل بتلاحظ أن فيه حاجه مش طبيعية بتحصل. ثم بتبدأ الأحداث في التصاعد علشان نكتشف ايه اللي بيحصل بالظبط في المنزل.
لو هانحسب نجاح لمخرجة الفيلم فلوريا سيجيسموندي هايكون نجاحها في تقديم (تريلر) مشوق للفيلم يخليني متشوقين جدا وحاسين أننا هانتفرج على فيلم قوي. لكن مع بداية مشاهدة الفيلم هانحس بإحباط كبير وأننا ضيعنا حوالي ساعتين من عمرنا في ولا حاجه!
ولما تكون بتقدم قصة نمطية مُستهلكة في The Turning من فضلك حاول تجيب ممثلين أفضل من ماكنزي ديفيس اللي كانت تعبيراتها باردة جدا وفشلت أنها تخلينا نشعر بالتوحد معاها في اللي بتقوم بيه في الفيلم.
لكن علشان نكون مُنصفين الفيلم قدم ديكورات جيدة ومتعوب عليها خاصة تصميم غرف القصر. لكن من امتى كانت أفلام الرعب بتنجح بالديكورات بس؟!
The Turning فيلم مُحبط على كافة الأصعدة. خاصة بعد ما عشمتنا التريلر بفيلم قوي.