The Vatican Tapes : لعبة استحواذ جديدة
مع بداية كتابتنا للنقد عن The Vatican Tapes افتكرنا المثل القائل : “تأتي الرياح بما تشتهي السفن” . علشان الأتقان والحماسة اللى تم اخراج وتقديم المشاهد الافتتاحية من الفيلم بيها، لم تستمر فى باقى مشاهد واحداث الفيلم، الامر اللى نقلنا من حالة من الحماسة العالية فى البداية لخيبة امل فى منتصف الأحداث أثرت على تقييمنا النهائى للفيلم.
الفيلم بيبدأ بجمل مكتوبة على الشاشة، عن اهتمام الفاتيكان فى الفترة الأخيرة بجمع اى ملفات فيديو او وثائق عن عمليات استحواذ حقيقية، طبعا احنا عارفين ان دي مش معلومة حقيقية وانها ضمن اطار التشويق المصاحب للفيلم اللى اخرجه مارك نيفلدين.
بيبدأ الفيلم بعد كده فى استعراض حياة انجيلا هولمز (اوليفر تيلور) البنت اللى بتعيش حياة طبيعية الا انها بتتعرض بعد كده لاستحواذ شيطاني من (المسيخ الدجال) شبيه المسيح واللى بينزل على الارض قبل القيامة بوقت قليل ويبدأ فى عمل معجزات شبه معجزات المسيح ويجمع حواليه الأتباع المخلصين تمهيدأ لبداية نهاية الحياة على الارض وقيام القيامة. وفقاً للمعتقدات المسيحية.
الفيلم بيعتمد على الاسلوب التصاعدي لاحداث الرعب، بمعني اننا بنشوف فى البداية مشاهد غير مرعبة وتفاصيل صغيرة، بتبدأ تتجمع مع السيناريو التصاعدي لحد ما توصل لمرحلة الذروة، لكن للاسف المستوي التصاعدي ده لم يكن بالقوة اللى كنا متوقعينها، حتي اننا فى لحظة الذروة –زي ما بيسميها السينمائيين- كنا فاكرين انها تمهيد لذروة اقوي.. لكن الفيلم احبطنا فى المنطقة دي واكتشفنا ان ده اقصي حاجه يقدر يقدمها صناعه.
على مستوي الخدع السينمائية والجرافيكس، على الرغم من قله استخدام الفيلم لها الا ان المشاهد اللى تم استخدام الخدع فيها كانت قوية ومؤثرة وليها مفعول قوي على خط سير الاحداث، على الرغم من احساسنا بالخدع فى بعض المشاهد الا ان بشكل عام مستوي الخدع السينمائية والجرافيكس كان متميز.
الموسيقي التصويرية ماقدمتش اى جديد للاسف وحسينا كانها مش موجوده من الاساس! ماعدا بعض المشاهد اللى كان ممكن تكون الموسيقي كانت متميزة فيها الى حد ما لكن للاسف كانت قليلة وكنا محتاجين انها تكون اكثر واقوي.
اخر حاجه حابين نتكلم عنها هى الاداء التمثيلي اللى كان تقليدي ومافيش كتير تم تقديمه فى الناحية دي.. كل شخصية كانت بتؤدي دورها زي اى فيلم استحواذ اخر.. مع بعض الاسراع فى رسم الشخصيات على صعيد السيناريو خصوصا فى منتصف الاحداث اللى كانت بتجري بسرعة علشان توصل لهدفها النهائى.
The Vatican Tapes كان ممكن يكون فيلم افضل بكتير لو كان التزم بالبداية القوية وعرض دور اكبر لفكرة مكتبة الفاتيكان السرية والملفات الموجوده فيها.
