The wedding ringer : كوميديا الأفراح لا تنتهي
الأفلام الكوميدية اللى بتتكلم عن عالم الافراح والليالى الملاح، لا تعد ولا تحصي، والحقيقة ان هوليود قدرت تقدم عدد لا ينتهي من التنويعات على الموضوع ده. ربما لهذا السبب لم نشعر ان The wedding ringer قدم جديد فى المجال ده، على الرغم من بعض المشاهد الكوميدية القوية.
(دوج هاريس) شاب مقبل على الزواج من (جريتشن) البنت الجميلة اللى بتنحدر من عائلة ارستقراطية، لكن (دوج) واللى قام بدوره (جوش جاد) بيعاني من مشكلة كبيرة.. وهى ان ماعندوش اصدقاء رجال يقدروا يكونوا اقرب الناس له خلال الفرح زي ما بتقول التقاليد الاجتماعية الامريكية. ومن هنا بتنشأ العقدة الاساسية فى الفيلم.
(جيمي كالاهان) هو الشخص المثالى اللى بيلجا له أمثال (هاريس)، مقابل المال (كالاهان) اللى قام بدوره كيفن هارت بيتدبر مجموعة من الرجال للعب دور الاصدقاء المخلصين، الامر اللى بيتحول لعاصفة من الكوميديا خصوصا مع زيارة الصديقين الوهميين لمنزل الاسرة لتناول الغذاء.
الأداء التمثيلي للأبطال كان جيد.. فقط جيد.. لا نستطيع القول انه كان ممتازا، وفى نفس الوقت نكون ظالمين لو قلنا انه كان ضعيف جدا، لكن الديكورات كانت قوية ومتميزة على العكس من الموسيقي التصويرية اللى كانت ضعيفه وغير مؤثرة فى الاحداث.
كيفن هارت على الرغم من قوة اداؤه، الا اننا كنا محتاجين نشوف له مزيد من الكوميديا القائمة على المواقف باكثر من الايفيهات واسلوب الكلام السريع، على العكس من جوش جاد واللى قدر يقوم بدوره بشكل قوي وخصوصا مشهد غناء الأغنية عن (جوز الهند والمخدرات) واللى اثار ضحك الجمهور على الرغم من تكرار استعمال الاغنية اكثر من مرة.
The wedding ringer مش افضل فيلم كوميدي شوفناه، لكن فى ظل الاحداث السياسية والاجتماعيه الصعبه. اى فيلم كوميدي هايكون محل ترحيب.. حتي لو كان مستواه مش قد كده.
