The Words: لعنة أخطاء الماضى
عُمرك فكرت فى أى غلطة –سواء كانت صغيرة أو كبيرة– عملتها زمان فى لحظة طيش أو عدم مسئولية؟ عمرك فكرت فى مدى تأثير الغلطة دى على حياتك بالكامل فى المستقبل القريب أو البعيد؟ عمرك فكرت –ولو لمرة– فى أن الغلطة دى ممكن تقلب حياتك رأسًا على عقب وتغير حاجات كثير فى مستقبلك؟
عن الزمن والماضى والأخطاء اللى بـ نعملها وبـ تفضل عايشة معانا بـ يقدم لنا المخرجان برايان كلوجمان ولى سترينثال، ومن بطولة زوى سالدانا، وبرادلى كوبر، ودينيس كويد وغيرهم، الدراما الرومانسية الجميلة The words.
الفيلم بـ يحكى عن كاتب بدأ يحصد نجاح وشهرة كبيرة بعد كتابته لكتاب مهم ومؤثر، ثم بـ تتحول الأحداث بدرجة كبيرة لما بـ نكتشف أنه مش كاتب الكتاب ده، وأنه حط اسمه عليه من غير ما يبذل أى مجهود، وبـ تبدأ الأحداث فى السخونة والتطور مع الوقت لشكل لا يمكن نكون متوقعينه لما شوفنا الأحداث فى البداية، مش عاوزين نحرق عليكم الأحداث أكثر من كده.
الفيلم بـ يعتمد فى بدايته على تشتيت المشاهد بين عدد من الروايات اللى مالهاش علاقة ببعضها، ثم مع الوقت بـ تترابط الأمور كلها وبـ تظهر فى نسيج واحد مترابط، وده أسلوب جديد علينا قدر المخرج يوصله لنا بسهولة ويسر، وده يحسب له.
لكن يحسب على الإخراج عدم الاهتمام بالموسيقى والديكور اللى جاءت مجرد تحصيل حاصل لمؤازرة الأحداث، وما حسيناش بأى من كلاهما.
بـ ننصحك تشوف الفيلم ده لو كنت من أصحاب التفكير الفلسفى ومحبى التفكير فى أثر الماضى على الحاضر والمستقبل.
