Thugs of Hindostan : التوليفة الهندية اللي عمرنا ما نزهق منها!
لما نشوف فيلم بيجمع الدراما بالكوميديا بالأكشن والمطاردات مع بعض الرومانسية. يبقى أحنا بالتأكيد أمام فيلم هندي! مافيش غير بوليود اللي بتقدر تقدم التوليفة الغريبة دي من الأفلام، ومافيش غير بوليود اللي بتقدر تقدمها بشكل جيد وناجح!
Thugs of Hindostan بيحكي عن الصراع الدائم بين الهنود والبريطانيين – اللى احتلوهم فترة طويلة من الزمن- من خلال قصة خوداباكاش آزاد (أميتاب باتشان) اللي بيحاول يحرر أحد المدن من قبضة شركة شرق الهند البريطانية اللي بتسيطر عليها. واللي بتحاول توقف مخططات (أزاد) عند حدها بطريقة إجرامية.
الفيلم بياخد القصة مجرد مدخل علشان نشوف مجموعة من الأحداث المترابطة المصنوعة باحترافية عالية. مابين الرومانسية والأكشن أو حتى مشاهد المطاردات والمبارزة بالسيوف. والمميز في الفيلم أن كل أحداثه تنتمي للعصور القديمة يعني هاننتقل في الزمان والمكان في نفس الوقت علشان نتابع الأحداث.
على الرغم من تقدم أميتاب باتشان في السن (حوالي 76 سنة) إلا أنه قادر على تقديم أداء تمثيلي عالي ومميز ومقنع. على الرغم من أن طبيعة الدور بتاعته كانت بتتطلب الكثير من الحركة والأنتقال من مكان لمكان.
بيشارك في بطولة الفيلم إسم تاني مهم هو عامر خان، واللي قام بدور (فرانجي) والحقيقة أن عامر خان من الممثلين اللي قدروا يثبتوا نفسهم بقوة في الفترة الماضية. ومن الواضح أنه بيعرف يختار أدواره بعنايه، زي دوره المميز في فيلم P.K أو فيلم Dangal وغيرها من الأعمال اللي بتؤكد على تميزه في الأداء وأهتمامه بالشخصيات اللي بيقوم بيها.
بيشارك ايضا في البطولة كاترينا كايف و فاطمة سانا شيخ و عبدالقادر أمين وغيرهم من الفنانين اللي قدر كل واحد منهم يقدم شخصيته بشكل مناسب ومقنع تماما لنا كمشاهدين.
من أكثر الأمور المميزة في الفيلم هي الموسيقى التصويرية الحماسية وتوظيفها المناسب في المشاهد، بالاضافة لاختيار الازياء والاسلحة والديكورات واللي بالفعل نقلتنا لفترة مش عارفين عنها معلومات كتير. ومع تميز المؤثرات الخاصة نقدر نقول ان الفيلم بالفعل من الافلام القوية والمميزة في تاريخ الهند.
بننصح بمشاهدة Thugs of Hindostan لعشاق الافلام الهندية، ولأي مشاهد عاوز يقضي 3 ساعات من وقته في مغامرة مشحونة بالرومانسية والأكشن.
