Time Freak : ليت الزمان يعود يوماً!
تيمة الرجوع بالزمن مش من التيمات الجديدة على السينما. وخاصة هوليود اللي قدمت توزيعات وتنويعات مختلفة على فكرة القدرة على العودة بالزمن للوراء. وبالتاكيد صناع Time Freak كانوا عارفين انهم مش بيقدموا فكرة مختلفة. ايه اللي ممكن يقدموه علشان يكون فيلمهم ناجح؟
Time Freak بيحكي عن الشاب العبقري ستيلمان اللي بيبتكر جهاز للعودة بالزمن علشان يقدر يكسب ود حبيبته اللي بتقرر تهجره. ومع كل محاولة فاشلة كان بيعيد التجربة من جديد. لكن السؤال اللي بيطرح نفسه: هل العودة بالزمن قادرة انها تصلح الأخطاء أم أن المكتوب واحد في كل الحالات؟
الأداء التمثيلي لابطال الفيلم صوفي ترنر و آسا باترفيلد كان من الأمور اللي عجبتنا جدا في الفيلم. كمان عجبنا تحويل الفيلم في جانب منه لما يشبه العاب الفيديو اللي بيتعلم فيها اللاعب من خلال التجربة والخطأ وده كان واضح من اخراج أندرو بولر – هو كمان مؤلف الفيلم – واللي قدر يقدم قصة جذابة.
لكن على صعيد اخر الفيلم ماقدمش أي تناول جديد لفكرة السفر في الزمن ذاتها. ونعتقد أن الهدف من الفيلم كان تقديم جرعة متوازنة بين الكوميديا والرومانسية وهو ده اللي نجح الفيلم فيه.
من الجميل كمان في الفيلم الموسيقى التصويرية واختيار زوايا وأماكن التصوير بحيث تتحول مشاهد الفيلم لرحلة بصرية ممتعة للمشاهدين.
Time Freak مش أحسن فيلم عن السفر في الزمن. لكن تجربة رومانسية كوميدية جميلة تستحق المشاهدة ببال رايق.
