Tinker Bell and the Legend of the NeverBeast : زيارة جديدة لعالم الجنيات
على الرغم من مشاغل حياتنا اليومية، وكم الواقعية اللى ممكن تصل لحد الملل، الا ان قليلا من الانفصال عن الواقع (الرخم) اللى بنعيشه، ممكن تكون تجربة كويسة من وقت لأخر.
لو كانت مشاهدتك لفيلم النهردة، ليها اى سبب من الاسباب غير محاولة الانفصال عن الواقع وتجربة قصة مختلفة وفيلم مختلف، يبقى من الافضل انك تدور على فيلم تاني تدخله، لان فيلم اليوم محتاج قدر كبير من الخيال، وقدر اكبر من القدرة على نسيان كل مشاكلنا الشخصية والغوص فى تجربة من الخيال بتمتد لحوالى ساعتين.
من تأليف (جيه ام باري)، واخراج ستيف لوتر، بنشوف مغامرة جديدة للجنية (تينكربيل)، الفيلم بيبدا بمشاهد افتتاحية بتعرفنا الى اى مستوي من الخطورة ممكن تعرض (تينكربيل)، وفضولها، وتهورها واندفاعها الدائم لاقتحام المجهول بدون دراسة عواقبه، اد ايه ممكن يأثر ده على بيكسي هولو، المملكة او الغابة اللى بتعيش فيها الجنيات المسحورة.
(تينكربيل) بتنطلق فى الغابة بعد ما بتتعلم الدرس بضرورة التحكم فى رغباتها وفضولها الدائمين، لكن ريما بترجع لعادتها القديمة بمجرد سماعها صوت غريب، واكتشافها لوحش أغرب وأضخم الف مرة من أضخم كائن ممكن تكون الجنيات المسحورة شافوه فى حياتهم. هل ها تقدر (تينكربيل) تسمع نداء العقل وتكبح جماح فضولها؟ ام ان الفضول ها يسيطر عليها ويسحبها فى مغامرة جديدة؟
طبعا كلنا عارفين ان الاختيار الثاني هو فعلا اللى حصل، وهى دي المغامرة اللى بنشوفها على مدار زمن الفيلم، ومش عاوزين نحرق احداثها عليكم اكتر من كده
الموسيقي التصويرية كانت من اكتر الحاجات اللى جذبت انتباهنا منذ الدقائق الاولى للاحداث وحتي نهاية الفيلم، موسيقي هادية وراقية ومتميزة، وفى مشاهد المطاردات او الاكشن كانت بتاخدنا فى رحله سماعية مدهشة، على الرغم من ايقاعها البطىء فى بعض المشاهد الاخري او بعض الهفوات هنا او هناك، لكن بصفة عامة الموسيقي كانت من الامور اللى تميز بيها الفيلم.
عرض الفيلم بتقنية 3D فى رأينا كان قرار غير موفق من صناع الفيلم، لان العرض لم يضف لنا اى جديد من ناحية الابهار والتقنية، وكنا متوقعين مستوي اعلى بكتير من اللى شوفناه على الشاشة، الامر اللى جعلنا متأكدين ان العرض الثلاثى الابعاد للفيلم كان بغرض رفع سعر التذاكر مش اكتر، وهو اسلوب جديد بنلاحظه بقالنا فترة.
مستوي التحريك والرسومات الخاص بالفيلم كان متميز، التحريك كان سلسل وهادىء ومتزن، ومحسيناش باى مشكله بخصوص الرسومات، سواء للشخصيات الضخمة او الاصغر حجما، كلها كانت متقنة ومصنوعة باهتمام كبير فى التفاصيل.
الأداء الصوتي لماي وايتمان، لوسى لو، جنيفر جودوين وغيرهم، كان متميز جدا، وعجبنا مشاركة نجمات كبار فى الاداء الصوتي لفيلم انيميشن، وهى خطوة على الرغم من تجربتها فى عدة تجارب دوبلاج انيميشن فى مصر، الا اننا نتمني يتم تطبيقها بشكل اوسع واقوي واكثر احترافا.
Tinker Bell and the Legend of the NeverBeast مش افضل فيلم انيميشن هانشوفه خلال الموسم، لكنه فيلم مناسب لأى اسرة معاها اطفال، او اى شخص كبير بيتمتع بالخيال الكافى والرغبة الكافية للانفصال عن العالم، ولو لساعتين.
