Tomb Raider: مغامرة جديدة للارا كروفت.

محبي شخصية لارا كروفت بيبحثوا عن أي فيلم بيتناول قصتها علشان يشاهدوه. والحقيقة أن شخصية لارا كروفت مش بس شخصية قوية ومؤثرة في مجال الأفلام، لكن كمان على مستوى ألعاب الفيديو وغيرها كتير من الأعمال الفنية اللي تناولت قصتها.

القصة

Tomb Raider بيحكي عن لارا كروفت اللي بتنطلق في رحلة للبحث عن خنجر أثري، بعد اختفاء والدها اثناء البحث عنه، لكن اللي ماحدش يعرفه أن الرحلة هاتتحول من مجرد رحلة للبحث، إلى محاولة يائسة للبقاء على قيد الحياة من خلال مجموعة من المأسي والكوارث اللي بنشوفها على مدار أحداث الفيلم.

فريق العمل

الفيلم من اخراج روار أوتاج وتأليف جينيفا روبرتسون-دويرت وبطولة أليشيا فيكاندر و دانيال وو والتون  جوجينز و دومينيك ويست و ألكساندر ويلوم

الأداء التمثيلي

اليشيا فيكاندر قدرت تأدي دور لارا كروفت بشكل رائع، ومختلف عن كتير من الفنانات اللي قدموه قبل كده وده يحسب لها، وكان واضح المجهود الكبير اللي قامت بيه علشان تخرج المشاهد الصعبة والخطيرة في الفيلم بالشكل اللي شوفناه به.

السيناريو والحوار والأخراج

سيناريو الفيلم غير ممل على الأطلاق، لكن لو كنت من محبي الأفلام اللي ليها جانب أنساني أو فكري، مش هايعجبك الفيلم لأن كل تركيزه كان على المغامرة والأحداث السريعة والمتعاقبة، أما محبي المغامرات هايشعروا أنهم مش قادرين ياخدوا نفسهم من تعاقب المشاهد والمغامرات في الفيلم.

الديكورات والموسيقى والأزياء

ديكورات الفيلم كانت جيدة، والمؤثرات والخدع السينمائية تم التلاعب بيها بمهارة وفي مشاهد قليلة لكن مؤثرة علشان نشعر في النهاية أننا أمام مغامرة متكاملة الأركان من خلال أحداث الفيلم.

الخلاصة

Tomb Raider هايعجب محبي أفلام المغامرات بشكل عام، ومحبي شخصية لارا كروفت بشكل خاص.

علشان تبقى عارف:

تقييم الفيلم على IMDB 6.8 من 10