Tomorrowland : فيلم انساني جميل
المخرج براد بيرد، كان المفروض يكون مخرج احدث اجزاء Star Wars ، لكنه فضل يخرج فيلم اليوم على انه يخرج جزء من سلسلة. حتي لو كانت السلسلة واحدة من افضل واقوي سلاسل افلام الخيال العلمي على مر التاريخ.
(كايسي) بنت مراهقة –قامت بدورها بريت روبرتسون – عندها افكار عظيمة وطريقة مختلفة وجديدة فى التفكير والتعامل مع الواقع. لكن حياتها الواقعية مش بتمكنها من تحقيق احلامها. مابين اب بيعمل على مشروع فاشل لوكالة ناسا ومهدد مشروعه بالهدم فى اى وقت، الامر اللى بيدفع كايسي لمحاولة تعطيل هدم المشروع قدر الامكان، الا انه بيتم القبض عليها، وعند خروجها من القسم بتعثر على (زرار) صغير لما بتلمسه… بينقلها لعالم جديد ومختلف كليا! العالم ده هو (عالم الغد)
جورج كلوني فى دور (فرانك والكر) واللى بيتعرض للطرد من (عالم الغد) بيتعاون مع (كايسي) فى سبيل تحسين (عالم الغد) وانقاذ الكوكب كله من الهلاك، الامر اللى بيدخلهم فى عالم من المطاردات المستمرة والصراع اللى بيوصل فى بعض الاحيان للهرب ببرج ايفل وتحويله لصاروخ فى الجو!
عجبنا جداً عدم محاولة حصد ارباح اضافية من خلال عرض الفيلم بتقنية 3D وهى الحجه الجديدة اللى طالع فيها القائمين على الافلام لزيادة الايرادات، وبنشوف افلام كتير بتعرض بتقنية ثلاثية الابعاد فقط علشان تزود تمن التذكرة على المشاهدين. لكن بعض المشاهد فى الفيلم حسينا اننا كنا عاوزين نشوفها بتقنية ثلاثية الابعاد، انما لو كانت IMAX نعتقد انها هاتكون اكثر ابهاراً وجمالاً
واضح جدا ان الفيلم لسه له جزء ثاني واحداث جديدة هايتم اضافتها، وشخصيات سيتم الدفع بها للاحداث وشخصيات هايتم الاحتفاظ بها، لكننا واثقين ان شخصية (اثينا) الانسانه الاليه الجميلة وخفيفة الدم –قامت بالدور رافى كاسيدي- هايتم الاستعانه بها من جديد واعادة احياء دورها فى السلسلة.
اداء جورج كلوني كان متميز، لكن فى بعض المشاهد حسينا انه اصبح اكبر سنا ومحتاج نوعية ادوار مختلفة، طبعا كلامنا ممكن يضايق الألاف من المعجبين بكلوني –وخصوصا من الجنس اللطيف- لكن ده كان انطباعنا عن اداء كلوني. ويمكن ده اللى دفع بالقائمين على الفيلم الدفع بشخصية كيسي كشخصية اكثر شبابا وقدرة على قيادة السلسلة فى الاجزاء القادمة.
الموسيقي التصويرية كانت متميزه ودافئة. صحيح خرجنا من الفيلم مش متذكرين بعض المقاطع، ودي علامة سيئة عندنا بنقيم على اساسها الموسيقي التصويرية لاي عمل بنشوفه، لكن بشكل عام الموسيقي كانت قويه وتُحترم. كمان الديكورات اللى تحالفت مع المؤثرات الخاصة علشان تخلق حالة جميلة اعجبتنا على مدار الاحداث
Tomorrowland فيلم محترم وبيقدم رسالة هادفة من خلال احداثه، لكن لو مش بتحب الخيال العلمي ومش بتقدر تـ(بيع عقلك) للمخرج والمؤلف.. ننصحك تشوف فيلم تاني.
