Trainwreck : معادلة نجاح ناقصة
على الرغم من احتواء الفيلم على عناصر النجاح الاساسية زي الرومانسية والكوميديا مع لمسة من الاباحية، الا انه فى النهاية –فى راينا- ماحققش النجاح المتوقع منه، والحقيقة ان ده مش راينا لوحدنا، ده كان متوسط اراء حوالى 30 الف مستخدم لموقع IMDBواللى قيموا الفيلم بـ6.7 بعد مشاهدته.
الفيلم من اخراج جود اباتاو فى اول تجربه له لاخراج فيلم مش من تأليفه، ومن بطولة بيل هادير و ماريسا تومي و بري لارسون وغيرهم من الابطال. وبيستمر عرضه لمدة حوالى ساعتين، للاسف كانت اللحظات اللى ضحكنا فيها محدودة، وايضا اللحظات اللى حسينا فيها بالاجواء الرومانسية كنت ايضا محدودة ونادرة.
الفيلم بيبدأ بمشاهد افتتاحية لحياة طفلة صغيرة، وازاى والدها رباها من الصغر على ان الزواج علاقة غير ناجحة وان الخيانة لها مردود افضل واحسن!
نتيجة التربية الغير تقليدية لبطلتنا، بترفض فى كبرها الارتباط باى شاب، على الرغم من شهوانيتها اللى حوال الفيلم التركيز عليها فى المشاهد الافتتاحية بشكل يخلي الفيلم مش مناسب للعرض العائلي.
الفيلم بينقلنا بعد كده لحياة البطلة وازاى بتتغير لما بتتعرف على طبيب شاب بناء على طبيعة عملها –هى بتشتغل صحفية- وبتعيش معاه وقت متميز بيخليها مهتمه انها تكمل فى علاقتها معاه على الرغم من باقى العلاقات اللى دخلتها واللى كانت مش بتكمل فيها
هل نقدر نقول ان الفيلم فاشل؟ الصراحة لا.. لكن نقدر نقول انه فيلم بيمتلك معادلة ناقصة للنجاح، وانه كان يحتاج يكون افضل من كده واكثر تركيزا من كده علشان نقدر نقول اننا شوفنا فيلم كويس ويملك معادلة ناجحة تماما.
الموسيقي التصويرية لعبت دور مهم فى الفيلم لكن الحقيقة احنا مش بنقيم النوعية دي من الافلام على معيار الموسيقي التصويرية.. الاحداث بتكون الوازع الاول والاخير لتقييم الافلام اللى بتجمع الرومانسية والكوميديا مع بعض.
الديكورات كانت متميزة وعكست محاولة الفيلم لتقديم احداث مرحة بالاضافة للمسة رومانسية مهمة لا خلاف عليها لكن زى ما قولنا اهتمامنا الاول والاخير هنا كان بالاحداث والقصة والسيناريو.
باختصار : لو عندك قدر كبير من التسامح مع الافلام وتقبل مستويات اقل من 100% من النجاح والتميز، فى الحالة دي فقط لازم تشوف Trainwreck
