Transformers: The Last Knight: الصراع الأخير من أجل البقاء
من الجميل أننا نجد الوقت الكافي علشان نفصل من كل حاجه حوالينا ونفرغ نفسنا لفيلم خيال علمي جميل.. لكن للأسف الفيلم لم يكن بالقوة اللي كنا نتوقعها منه.
القصة
الفيلم بيحكي عن رئيس كوكب سايبرترون واللي بيجد نفسه مجبر على البحث عن قطعة أثرية في كوكب الأرض علشان يقدر ينقذ بيها كوكبه من الموت. القطعة اللي بتجدد حرب ضروس بيدفع ثمنها سكان كوكبنا اللي بيحاولوا يبقوا على قيد الحياة.
فريق العمل
الفيلم من تأليف مات هولواي ومن اخراج مايكل باي، البطولة من نصيب أنتوني هوبكنز و مارك ويلبرج و لورا هادوك و جون جودمان
الأداء التمثيلي
على الرغم من قوة الأسماء المشاركة في الفيلم الا أن الأداء التمثيلي لم يكن بالقوة اللي كنا نتوقعها، مع أن توقعاتنا لفيلم فيه انتوني هوبكنز ومارك ويلبرج على وجه التحديد بتخلينا نعتقد أن الأداء التمثيلي كان المفروض يكون اكبر بكتير من اللي شوفناه في النهاية.
السيناريو والحوار والأخراج
سيناريو الفيلم للأسف أصابنا بالملل خاصة في النصف الأول من الأحداث، لكن النصف الثاني من الأحداث كان اقوى شوية نتيجة مشاهد الصدامات والمطاردات والصراعات الضخمة، وتدخل المؤثرات الخاصة بشكل كبير على حساب الأحداث والمشاعر الإنسانية. علشان كده بنلوم الإخراج كمسئول أول عن اللي شوفناه في النهاية على الشاشة.
الديكورات والموسيقى والأزياء
ديكورات الفيلم كانت جيدة جدا، وكمان المؤثرات الخاصة والملابس كان متعوب فيهم جدا، وللأسف يعتبروا هما النقطة الوحيدة الإيجابية في الفيلم كله خاصة مع سقوط الأداء التمثيلي وشعورنا انه كان ضعيف ومحتاج يكون اقوى.
الخلاصة
الجزء الجديد من Transformers اعتمد على المؤثرات الخاصة علشان يحقق نجاحه على حساب التمثيل. لكن السؤال: من امتي المؤثرات الخاصة بتحقق نجاح فيلم!
علشان تبقى عارف:
تقييم الفيلم على IMDB 5.3 من 10 وشارك في الاستطلاع حوالي 40 الف مستخدم للموقع.
