Triple9 : رمز يستحق الحياة من أجله. والموت من أجله
(رمز يستحق الحياة من أجله. والموت من أجله)
دي كانت الجملة الترويجية اللى تم استخدامها فى فيلم Trible 9 أو 999 للدلالة على أهمية الكود999
واللى مش عارف ايه حكاية الأكواد دي نحب نشرحها له باختصار قبل ما نتكلم عن الفيلم.. نظام الشرطة فى امريكا بيعتمد على التواصل بالاسلكي بين افراد الشرطة وبين إدارة النجدة (اللى يقدر اي حد يكلمها على الرقم911).. واختصاراً للوقت والجهد تم الإعتماد على مجموعة من الأكواد بين رجال الشرطة لوصف المشاكل المختلفة اللى بيواجهوها فى الشارع.
يعني مثلا لو استخدم الشرطي الكود 901 ده معناه ان فيه حادثه حصلت، ولو استخدم 947 يبقى محتاج تواجد عربية مطافى، ولو استخدم الكود 936 يبقى محتاج يستعلم عن بيانات سيارة.. الخ الفيلم بيحكي عن الكود 999 واللى بيعني تعرض شرطى لخطر شديد أو لإطلاق النار.
الفيلم من اخراج جون هيلكوت ومن بطولة كيسي افليك و وودي هاريلسون بالإشتراك مع كيت وينسلت وأخرين، وبيحكي عن محاولة مجموعة إجرامية بتخطط لقتل ظابط شرطة شريف كعملية تمويهية للتغطية على أكبر عملية سرقة لعصابتهم.
الفيلم بيبدأ بمشاهد افتتاحية لسرقة احد البنوك، والحقيقة ان المشهد فعلا بيعتبر رائع ومن افضل المشاهد الافتتاحية اللى شوفناها مؤخرا فى افلام هوليود، والحقيقة ان تريلر الفيلم اعتمد على جزء كبير من مشاهد الافتتاحية علشان يعطينا انطباع اننا هانشوف فيلم اكشن بنسبة 100%، لكن الحقيقة دي كانت خدعة من صناع الفيلم، لان الفيلم مش بس بيقدم لنا جرعة من الاكشن، بل كمان بيقدم لنا جانب كبير من الاثارة والتشويق من خلال تقديم عملية خداع صعبة ومعقدة على الشاشة.
الفيلم محتاج تركيز كبير واهتمام بكل تفصيلة فى احداثه، خاصة مع الاسماء الكتير للنجوم والابطال اللى شاركوا فى اداء الفيلم، الامر اللى اثر على تركيزنا شوية فى بداية الفيلم لكن مع الوقت بدأنا فى التحمس للاحداث والانغماس فيها ومحاولة تفسير الخدعة اللى بتحملها لنا الأحداث طوال الوقت.
الموسيقي التصويرية كان لها عامل كبير على دخولنا فى التفاصيل، على الرغم من ان الموسيقي فى كتير من الاحيان كانت بتعطينا انطباع بان القائمين عليها مكانوش مهتمين بتقديم مزيكا مختلفة بقدر اهتمامهم بتقديم خلفية موسيقية مناسبة للاحداث اللى بنشوفها على الشاشة، وبشكل عام الموسيقي مكانتش العامل رقم 1 اللى جذب انتباهنا بقدر ما جذب انتباهنا مشاهد السرقة والاقتحام والمطاردات اللى فى الفيلم.
Trible9 هايكون فيلم مثالى للمشاهدين اللى بيحبوا الاكشن اللى فيه فكره، واللى بيقدم لهم حبكة تقيلة وفيلم هايسرق من وقتهم حوالى ساعتين من الاندماج التام فى الأحداث، اما الناس اللى مش بتحب الاكشن، ننصحها تختار فيلم تاني تماما غير Trible9
