Trouble : الكلب ده اسم على مسمى!
Trouble ده مش صفة.. ده اسم كلب.. وبعد مشاهدتنا للفيلم عرفنا أن مافيش فرق كبير بين الإسم والصفة!
Trouble بيحكي عن كلب بيحاول يهرب من أبناء أصحابه السابقين. وفي طريق الهرب بيتعلم أنه يتحول من كلب مرفه لكلب حقيقي بيعيش في الشارع وبيواجه المواقف اللي بتواجه أي كلب شارع.
الجميل في كتير من مشاهد الفيلم هو مستوى الكوميديا الجميل والمعتمدة على المواقف أكتر من اعتمادها على الايفيهات والصراحة مستوى الذكاء في كوميديا الفيلم كانت رائعة.
من الحاجات اللي عجبتنا في الفيلم الأداء الصوتي لأبطاله دي برادلي بيكر و وكولبي لوبيز و كارلوس بينافيجا وباقي أبطال الفيلم واللي قدروا يخلونا نتخيل الكلاب فعلا بتتكلم وتتفاعل مع بعضها.
كمان موسيقى الفيلم كانت جميلة وتنوع الألوان في الفيلم كانت حلوة وتقدر تجذب العين – خاصة عيون الأطفال- وتخليهم مهتمين بالمشاهدة والمتابعة من أول لقطة لأخر لقطة.
ماعجبناش في الفيلم نمطية الحبكة. أو بمعنى أصح أن القصة النمطية (التحول من شخص مرفه لشخص حقيقي) ماتمش تقديمها بشكل مختلف أو جديد. ونفس التيمة بنفس تفاصيلها هاتشوفها في أعمال تانيه كتير لعل أشهرها في المنطقة العربية فيلم H دبور لأحمد مكي.
في نهاية كلامنا عن Trouble ننصح بمشاهدته للكبار والصغار على حد سواء. لكن بدون توقعات مسبقة أو بدون تصور أنكم هاتشوفوا فيلم مختلف أو جديد من حيث الحبكة. لكنه بيقدم جرعة كوميديا جميلة.
