Trust : الكوميديا والجريمة فى خلطه واحده!

هوليود عندها القدرة على تقديم أفلام بتجمع أكتر من تيمة مختلفة مع بعض فى نفس الخلطة السينمائية، والحقيقة دي حاجه من الحاجات اللى بنحبها فى إنتاجات هوليود.. صحيح بوليود مؤخراً بدأت تتجه لنفس الإتجاه لكن هوليود بتقدر تلعب على الخيط الحساس الفاصل بين الجريمة والكوميديا بذكاء ودهاء متميزين.

من إخراج الأخوين ألكس وبين بروير ومن بطولة نيكولاس كيدج و اليجا وود و كريستي بيران بنشوف قصة أتنين من عناصر الشرطة، واللى بيعيشوا حياتين مختلفتين تماماً عن بعض لكن بيجمعها عنصر واحد: التفكك الاسري والمعاناة من الوحدة… بعد فترة بيبدأ أحد رجال الشرطة (نيكولاس كيدج) فى ملاحظة سلوك مشبوه من أحد المجرمين، وبيبدأ فى تعقب الأحداث الغامضة اللى بتحصل قدامه لحد ما بيلاقى نفسه متورط مع زميله فى محاولة السطو على خزنه مجهولة فى أحد المباني.

على الرغم من انتماء الفيلم لفئة أفلام الجريمة والأكشن والحركة، إلا أننا مانقدرش ننكر عدد كبير من المشاهد الكوميدية اللى جعلتنا نضحك بشدة، لكن فى منتصف أحداث الفيلم تقريباً بتستحوذ الحركة على سيناريو الفيلم بالكامل تقريباً.

الأداء التمثيلي لنيكولاس كيدج كان متميز وقوي، على الرغم من إخفاقاته المتتالية فى أعماله السابقة، وحالة الفشل السينمائي اللى بيعيشها بقى له فترة طويلة، إلا أن أداؤه فى Trust كان قوي، وكان واضح أنه متحمل عبء دراما الفيلم والكوميديا فيه، على الرغم من اليجا وود واللى كان دوره مساعد لنيكولاس كيدج، وحسينا إنه مش قادر يقوم بدوره بنفس قوة وكفاءة كيدج. باقي الممثلين فى الفيلم نقدر نعتبر أدوارهم بسيطة وغير مؤثرة فى سياق الفيلم، وبشكل عام نقدر نقول أن الفيلم من نوعية الأفلام اللى بتعتمد على عدد قليل جداً من الممثلين.

بنعيب على الفيلم شعورنا بالملل فى جانب كبير من أحداثه، بمعنى أن السيناريو مش بيتحرك بالسرعة الكافية اللى تخلينا بعيدين عن الملل، لكن فى الربع الأخير من الأحداث السيناريو بيعود لنشاطه وسرعته العادية وبيقدم لنا أحداث مثيرة ومتميزة.

الموسيقي التصويرية للأحداث واللى اعتمدت على الأغاني فى جانب كبير منها كانت متميزة جداً، وقدرت تسرق انتباهنا بوجودها طوال أحداث الفيلم وده شىء متميز جداً ومش بيحصل كتير إن الموسيقي تكون قادرة على القفز لواجهة الأحداث بالشكل المتميز ده.

Trust مش فيلم كوميدي ومش فيلم أكشن، لكنه فى النهاية عمل مُختلف وقادر على جذب انتباهنا ونرشحه للمشاهدة لو كان عندكم بال رايق وصبر على الجزء الأول من الأحداث.