Tulip Feve : الحب مفتاح المشكلات

على الرغم من فكرتنا القديمة عن الحب إنه الختام النهائي والجيد للعلاقات الرومانسية، إلا أن في Tulip Fever الحب كان هو المفتاح اللي بدأت بيه كل المشكلات والعقد في الحدوث والتطور. تعالوا نتعرف أكتر على الفيلم ورأينا فيه.

القصة

بتدور أحداث Tulip Fever في العاصمة الهولندية أمستردام، واللي بتشهد في الفترة دي من القرن السابع عشر اهتمام كبير بزهور التوليب – وهولندا عموما مشهورة بالورود على أختلاف أنواعها – والفيلم بتدور أحداثه عن رسام شاب بيقع في غرام سيدة شابة، لكنها في نفس الوقت متزوجة، الأمر اللي بيفتح على الجميع بوابات لا تنتهي من الجحيم.

فريق العمل

الفيلم مقتبس عن رواية للكاتبة ديبورا موجاش وكتب لها السيناريو والحوار توم ستوبارد أما البطولة فكانت من نصيب ماثيو موريسون و زاك جاليفينكس و ديفيد هاروود و جودي دينش و كيفين ماكيد

الأداء التمثيلي

في رأينا نجح أبطال Tulip Fever في أنهم يقدموا لنا أداء تمثيلي مميز، خاصة اليشيا فيكاندر اللي تفوقت على نفسها في الأداء، وليه لا وهي شاركت في أفلام ثقيلة زي EX Machina و The Danish Girl و The Man From U.N.C.L.Eوغيرها من الأعمال.

السيناريو والحوار والأخراج

سيناريو الفيلم شعرنا معاه ببعض الملل، خاصة في النصف الأول من الأحداث، لكن بعد كده بيقدر السيناريو يسحبنا لملعبة وبنبدأ نشعر كأننا موجودين في قلب الأحداث بالفعل، وده تكنيك شارك في صناعته الأخراج اللي ركز على التفاصيل الصغيرة في الفنانين وانفعالاتهم وطريقة تأديتهم لكل مشهد. أما حوار الفيلم نفسه فتم اختيار كل كلمة بشكل دقيق جدا لدرجة أننا شعرنا ببعض التكلف في الحوار، لكن من الواضح أن ده كان مقصود علشان يتم إشراك الحوار في الفيلم كلاعب أساسي في الأحداث مش مجرد معبر عن شعور كل شخصية.

الديكورات والموسيقى والأزياء

ديكورات الفيلم حققت لنا نقلة حقيقية زمانية للقرن السابع عشر، ونقلة مكانية للمدينة الجميلة والقديمة أمستردام وتضافرت مع الموسيقى الرومانسية الحالمة والمتصاعدة في مشاهد الصراع والأزياء المتطابقة مع الفترة الزمنية والمكانية علشان يقدموا لنا في النهاية تجربة مشاهدة مميزة

الخلاصة

فيلم Tulip Fever فيلم جيد جدا للناس اللي بتحب أفلام المغامرات العاطفية، خاصة اللي بتحصل في أزمنة قديمة.

علشان تبقى عارف:

تقييم الفيلم على موقع IMDB 6.3 من 10 وشارك في التقييم حوالي 3000 مستخدم للموقع.