UglyDolls : حب نفسك علشان العالم يحبك
علشان تبقى عارف: الفيلم بيتعرض في الولايات المتحدة بالتزامن مع مصر تقريبا، والفيلم من انتاج أمريكي صيني كندي مشترك
بنحب دايما نتفرج على أفلام الأنيميشن اللي لها قصة وبتحاول توصل هدف ورسالة مش مجرد استعراضات وأغاني وخلاص. وهو ده اللي شوفناه مع UglyDolls
UglyDolls بيحكي عن مجموعة من الدُمى اللي شكلها مختلف عن باقي أشكال الدُمي. الأمر اللي بيأثر عليهم بالسلب في البداية. ثم بيتعلموا مع الوقت معنى كونهم مختلفين. وأن تقبل الأخرين جزء من تقبلهم لنفسهم. وأن الشخص علشان يبقى محبوب وكويس مش لازم يكون كامل. لكن ممكن يعيش بشخصيته الحقيقية بعيد عن أي محاولة للتصنع.
الأداء الصوتي لأبطال الفيلم جانيل موناي و واندا سايكس و ليهوم وانج وباقي الأبطال كان أكتر من رائع. وكان واضح حرص مخرج الفيلم كيلي اسبوري على أنه يخرج من أبطال الفيلم بأحسن أداء ممكن وده اللي حصل بالفعل.
طريقة تحريك الشخصيات على الشاشة ودقة الرسومات كانت عالية جدا وممتعة. بعض المشاهد كان فيه كرنفال ألوان جميل جدا. وطبعا الاستعراضات والموسيقى التصويرية كانت جيدة جدا وحسستنا أد ايه الفيلم متعوب عليه انتاجيا علشان يظهر في النهاية بالشكل القوي ده.
UglyDolls فيلم جميل وفيه رسالة قوية ومؤثرة. ننصح بمشاهدته لكل محبي أفلام الانيميشن.
