Unconscious : فيلم رعب مُفبرك

احنا مش ضد الأفلام منخفضة الميزانية على الأطلاق.. على العكس احنا من مشجعي النمط ده من الأفلام لأن أنخفاض الميزانيه بيجبر صناع السينما على ابتكار اساليب وحلول جديدة وطرح شخصيات مختلفة فى افلامهم.. لكن انه يتم التلاعب بالمشاهدين وعمل فيلم (مفبرك) ومصور فى اماكن محدوده جدا.. ده اللى ضايقنا بشده فى فيلم اليوم.

من اخراج مايكل بوليش وبطولة كيت بوسورث و ويس بنتلي و ريتشارد رايهلي و شاشاوني هال بنشوف قصة رجل بيصحي من نومه بيلاقى نفسه طريح الفراش فى مكان مش معروف له بالظبط.. وبالقرب منه واحده جميله –لكن مريبة بعض الشىء- بتقول له انها زوجته، وانه فقد ذاكرته فى حادثة صعبه.. لكن الزوج اللى بيكتشف انه ناسي كل شىء، وان الذكريات عنده بترجع له كمشاهد ضبابية فى الأحلام، بيكتشف ان الكلام ده مش حقيقي.. وان القصة وراها شىء اغرب واصعب من كده.. وان الـ…. مش عاوزين نحرق عليكم الأحداث اكتر من كده.

القصة جميلة وكان ممكن تنفيذها يكون اجمل، لكن الفبركة اللي شعرنا بها فى القصة تمثلت فى فقر وقلة الاماكن اللى بيتم فيها التصوير، بحيث يتم تصوير الفيلم بالكامل فى ديكورات مغلقة بدون مشاهد (خارجي) تقريبا، الاسوأ من كده هى حالة الأستسهال الشديدة فى اظهار قسم الشرطة والموجودين فيه، بحيث اصبح عندنا شعور ان الاحداث بتتم فى مدينة مافيهاش غير المنزل اللى بتدور فيه الاحداث وقسم شرطه فيه حوالى 3 ظباط!

الديكورات كانت كويسة ومتناسبة مع الرغبة فى صنع فيلم محدود الميزانية، الموسيقي لم تكن على القدر الكافي من الجمال علشان نهتم برصدها اساسا!، لكن افضل مافي الفيلم كان الحبكة والأداء التمثيلي لـ كيت بوسورث اللى على الرغم من نمطيته واستعمالها لكتير من المعلومات العامة فى سياق الحوار الا انه كان كويس.

Unconscious فيلم رعب غير مرعب.. لا يستحق تمن تذكرة السينما، لكنه ممتاز لو هاتشوفه فى التلفزيون مع مشروب ساخن.. او بارد!