Underworld: Blood Wars : هل فيلم أكشن أم فيلم رعب؟!

لما نوصل لمشاهدة الجزء الخامس من سلسلة أفلام – مع وعد بإنتاج جزء سادس- لازم نبدأ نسأل نفسنا: هل قدر صناع السلسلة تحقيق المطلوب منهم، والحفاظ على حالة الشغف والإهتمام من المشاهدين بنفس القدر فى الأجزاء السابقة من السلسلة؟ بنعتقد إن ده أهم وأكبر معيار لنجاح فيلم بيوصل لمحطته الخامسة.

السلسلة بدأت فى 2003 مع فيلم Underworld واللى كان بيحكي عن مصاصة الدماء (سيلين) واللى بتدخل فى حرب مفتوحة من أجل الإنتقام لعائلتها من مجموعة ضخمة من المستذئبين.

مع نجاح الفيلم تم إنتاج جزء ثاني له سنة 2006 بعنوان Underworld: Evolution واللى بنستكمل فيه قصة سيلين وتطوراتها وتطورات علاقتها العاطفية من ناحية، ومن ناحية تانية بنشوف تطورات قتالها ضد أعدائها من الجزء الأول.

فى 2009 تم إصدار الجزء الثالث بعنوان Underworld: Rise of the Lycans واللى بيشهد ميلاد شخصية بنت سيلين ومحاولتها حمايتها، وبنشوف استكمال للصراع اللى بدأ من الجزء الأول بين المستذئبين ومصاصي الدماء.

وفى 2012 بنشوف Underworld: Rise of the Lycans واللى بيتعرض أكتر لقدرات بنت سيلين، وللصحوة اللى بتحصل للمستذئبين واللى بتضطر سيلين لمواجهتها.

فى الجزء الجديد بتبدأ الأحداث بمشاهد افتتاحية بتحاول تلخص اللى احنا قولناه ده… طبعا بيكون من الصعب اختصار 4 أفلام فى دقائق معدودة، لكن الإفتتاحية كانت مناسبة للأشخاص اللى لم يتابعوا السلسلة كلها انهم يقدروا يكونوا عنها فكرة معتبرة قبل الدخول فى الأحداث الجديدة، وان كان من الافضل طبعا إن المشاهدين يكونوا متابعين السلسلة من بدايتها.

الأداء التمثيلي للأبطال  كيت بيكنسيل و ثيو جيمس و توبياس مينزيس و ديفيد بولز و براين كاسبي  تشارلز دانس  كان فى خانة من مقبول إلي جيد.. وبنعتقد إن شخصية سيلين (بهتت) على شخصية كيت بيكنسل واللى قدمتها على مدار 5 أفلام حتي اليوم.

الموسيقى التصويرية كانت قوية ومؤثرة وساعدت على دخولنا الجو العام للفيلم بسرعة وسهولة، كمان المؤثرات الخاصة ساعدتنا لدرجة كبيرة على تقبل وتفهم أحداث الفيلم خاصة ان الفيلم كله تقريباً قايم على صراع وهمي بين كائنات مش موجوده أصلا!

الإخراج لـ  أنا فورستر اللى قدرت تقدم إخراج متوازن بيحاول يمشى على نفس خطوط الأجزاء السابقة وفى نفس الوقت يقدم لونه الشخصي اللى يميز الجزء ده عن باقى الأجزاء، ويضيف أكتر للأحداث ومايتحولش لمجرد جزء فى سلسلة طويلة والسلام… حتي إننا لاحظنا خلال الربع الأخير فى الأحداث تقريباً إتجاه لإغلاق خيوط كتيرة فى السيناريو والقصة اللى من تأليف داني ماكبرايد  و  لين وايزمان.

فى النهاية إحنا شايفين إن الجزء الخامس من سلسلة أفلام Underworld يعتبر جزء جيد لكنه بدأ ياخد السلسلة لمنطقة من الملل والتكرار رغم كل محاولاته للتجديد… وبنصنفه كفيلم يجمع بين الرعب والأكشن وإن كان يميل للأكشن فى المقام الأخير.

علشان تبقى عارف:

بعد أن قرر صناع الفيلم أن يكون هذا الجزء هو الجزء الختامي للسلسلة، تقرر إنتاج جزء سادس.