Unforgettable: الغيرة أصل كل الشرور
في رأينا الشخصي، الغيرة النسائية تعتبر واحدة من أكثر محركات النساء ناحية ارتكاب الجرائم والمشكلات، ونظرة خاطفة لصفحة الحوادث اليومية تعرفنا قدر الجرائم البشعة اللي بيتم ارتكابها بسبب الغيرة. وفيلم اليوم بيحكي عن الغيرة واللي ممكن تسببه من مشكلات توصل للجريمة المنظمة والمحترفة.
قصة الفيلم
الفيلم بيدور في اطار من التشويق والاثارة، عن واحده بتوقعها الظروف في التعرف على حبيبة زوجها الجديد، وفى البداية بتحاول تتعامل مع الأمر بشكل عادي، لكن مع الوقت بتكتشف انها مش قادرة تتعامل مع الأمور بشكل عادي، وبتجد نفسها بتخطط وتدبر لتحويل حياة حبيبة زوجها الجديدة لجحيم حقيقي. ازاي هاتعمل كده؟ وها توصل لهدفعها ازاي؟ وهل ها تقدر تنجح في اللي عاوزه توصل له؟ هو ده اللي ها نشوفه من خلال أحداث الفيلم.
فريق العمل
الفيلم من اخراج دينيس دي نوفي ومن تأليف كريستينا هودسون و ديفيد جونسون أما البطولة فكانت من نصيب روزاريو داوسون و كاثرين هيجل و جيوف ستولتس و ويتني كامينغز.
السيناريو والحوار والإخراج
سيناريو الفيلم كان مترابط جدا، وقادر يحكي لنا القصة من البداية للنهاية بترتيب وتنظيم، وفى نفس الوقت بطريقة ممتعة وجذابة، والحقيقة أن السيناريو قدر يلعب على عامل السهل الممتنع، بحيث قدر ينقل لنا الأحداث بقوة وفى نفس الوقت بدون (فذلكة) من الفذلكات اللي بقينا متعودين عليها في كتير من السيناريوهات اللي أصبحنا بنشوفها في بعض الأفلام مؤخرا.
على صعيد أخر الإخراج لم يكن بنفس القوة اللي كان عليها السيناريو، وللأسف الإخراج كان مشتت بين استعمال تقنيات التصوير والمؤثرات، وبين محاولته خدمة القصة بشكل جيد، وللأسف الإخراج لو كان أقوى الفيلم كان هايكون أفضل ألف مرة من النتيجة النهائية اللي شوفناها.
الموسيقى والديكور
موسيقى الفيلم كانت قوية جدا، وكانت عارفه امتى تكون هادية علشان تتركنا للإثارة، وامتى تتعالى علشان تكون هي نفسها من مصادر الإثارة الأساسية في الأحداث. أما الديكورات فللأسف كانت أضعف من توقعاتنا، وكانت أضعف من مستوى الفيلم بشكل عام.
الخلاصة
Unforgettable فيلم تشويق واثارة ورعب، ينفع للمشاهدة على رواقة في نهاية الأسبوع
علشان تبقى عارف: كانت المخرجة (آما آسانتي) هي المُرشحة الأصلية لإخراج الفيلم لكنها انسحبت من المشروع بعد رفض (كيري واشنطن) أحد الأدوار الرئيسية، وحلّت المخرجة (دينيس دي نوفي) بدلًا منها لإخراج الفيلم.
