Unfriended : الرعب عبر شاشة (سكايب)
“فيلم مالوش اى 30 لازمه. وتقريباً اتكلف 10 الاف دولار او اقل”
ده كان تعليق واحد من مشاهدي الفيلم على احد المواقع المهتمة بالسينما. لكن احنا كنا مختلفين معاه بنسبه كبيرة فى رايه. ولينا اسبابنا.
من اخراج ليفان جابريادزي وتاليف نيلسون جريفز بنشوف قصة بنت بتنتحر بعد التنمر والتريقة عليها على الانترنت والفيس بوك وباقى مواقع التواصل الاجتماعي. وفى الذكري السنوية الاولى لانتحارها بيظهر شبحها على شكل مستخدم غامض لبرنامج (سكايب) وبيبدأ يمارس الاعيب صعبة على مجموعة من الاصدقاْء، فى سبيل الانتقام ومعرفة مين المسئول عن تحويل حياة البنت لجحيم.
الفيلم بالكامل تم تصويره على واجهة استخدام برنامج Skype المميزه، واللى عرفنا انه تم صنع واجهة مزيفة وعدم استعمال البرنامج الاصلي علشان يضمن القائمين على الفيلم عدم حدوث اى تقطيع فى الصورة او المشاهد وغيرها من المشكلات اللى بتحصل فى الاتصال.
لو اللى بيتفرج على الفيلم مش بيحب او مش بيفهم فى الحياة الالكترونية ومواقع التواصل الاجتماعي وبرامج الاتصال بالاخرين، يبقى من الافضل يدور على فيلم تاني من دلوقت لان الفيلم بالكامل معتمد على فهم المشاهدين لحياة الانترنت بشكل عام، حتي ان الموسيقي التصويرية للفيلم عبارة عن مقاطع موسيقية بيتم تشغيلها على الابتوب اللى بتدور من خلاله الاحداث.
مالاحظناش اى اخطاء فيما يتعلق بالمشاهد الملتقطة لحسابات الفيس بوك او باقى المواقع اللى بتظهر فى الفيلم، وده يعرفنا ان الفيلم تم تصويره حديثا قبل تغيير شكل هذه الواجهات، كمان عرفنا ان امعانا فى اقناع المشاهدين بالفيلم فان الحسابات اللى بتظهر على موقع فيس بوك حقيقية ويمكن الوصول لها فعلا ودي كانت رغبة صناع الفيلم علشان يعملوا شىء مقنع وشبه الحقيقي.
اما فى ردنا على الناس اللى بتقول ان الفيلم تافه.. نحب نلفت نظرهم لظاهرة انتحار المراهقين فى الولايات المتحده وغيرها من الدول نتيجة الهجوم عليهم الكترونيا والتريقة عليهم واحيانا مطالبتهم بالانتحار علنا. وهناك اكتر من حالة انتحرت فعلاً نتيجة التريقة الالكترونية والتعليقات السلبية.
اما عن ميزانية الفيلم القليلة فا هى دي الحقيقة فعلا. الفيلم تم تصويره فى منزل واحد بحيث يكون كل ممثل فى غرفه مستقله وبيؤدي دوره، وده لا يحسب على الفيلم وصناعه بل يحسب لهم قدرتهم على عمل فيلم قوي ومؤثر بميزانية قليلة.
التريقة الالكترونية وتتبع الاشخاص على المواقع المختلفة، ممكن يكون مش مؤثر قوي فى مصر، لكنه سرطان بيزحف على العالم الغربى، واكيد هانواجهه فى مصر قريب جداً.. ساعتها هانحتاج نشوف فيلم زي unfriended تاني!
