Unlocked: لعبة المخابرات والارهاب
مع تطور الأوضاع السياسية على مستوى العالم، كان لازم أفلام الجاسوسية وأجهزة المخابرات تاخد نقلة أبعد من مجرد محاربة الشيوعين الأوغاد، وتستبدل بيهم عدو جديد هو جماعات التطرف الديني، وفيلم Unlocked من أكبر الأمثلة على التطور ده.
القصة
الفيلم بيحكي عن عميلة المخابرات البريطانية أليس راسين، اللي بتقوم بدورها السويدية نومي راباس واللي بتعتزل العمل الاستخباراتي بعد فشلها في كشف حادث إرهابي كبير في لندن، لكن مهمة جديدة بيتم اسنادها لها، فقط علشان تكتشف أنها كانت ضحية خدعة كبيرة وأن المطلوب منها مش بس أنها تظل على قيد الحياة، لكن أيضا أنها تكشف أبعاد مؤامرة بتستهدف تنفيذ هجوم بالأسلحة البيولوجية على بريطانيا.
فريق العمل
الفيلم من اخراج مايكل أبتد وتأليف بيتر أوبريان وبطولة نومي راباس وأورلاندو بلوم وتوني كوليت ومايكل دوجلاس وجون مالكوفيتش.
الأداء التمثيلي
كان واضح أن كل العبء التمثيلي في الفيلم وقع على نومي راباس، والحقيقة أنها قدرت تقوم بدورها على أكمل وجه، وكان واضح التمارين الرياضية اللي قامت بيها علشان تكون في الفورمة المناسبة علشان تقدر تنفذ مشاهد الأكشن خلال الأحداث. وكان من الواضح أنها نجحت في دورها.
اشادة كمان لازم نقولها بخصوص مايكل دوجلاس اللي قام بدور متميز رغم صغر مساحة الدور الخاص به، لكنه قام به بشكل متميز وفكرنا بنفسه وأفلامه المميزة.
السيناريو والحوار والأخراج
سيناريو الفيلم أقحمنا في الأحداث بأسلوب الخداع. بمعني أنه بيسيبنا مع الأحداث لحد ما نكتشف وحدنا انه تم خداعنا زي ما تم خداع بطلة الفيلم بالظبط، والأسلوب ده مفيد جدا علشان المشاهدين يشعروا بالاندماج في الاحداث وانهم بالفعل جزء منها.
لكن من ناحيه تانيه بنعيب على الفيلم أن الحبكة الخاصة به كانت معروفة بالنسبة لنا وكنا قادرين نستنتج أكتر من 90 % من الأحداث واستنتاجنا كان في محله، وكنا محتاجين الحبكة تكون أكثر اثارة.
الديكورات والموسيقى والأزياء
ديكورات الفيلم كانت ضعيفة وكنا محتاجين تكون أقوى من اللي شوفناه في النهاية، خاصة أن المشاهد الداخلية احتلت جزء لا يستهان به من الأحداث. كمان الموسيقى التصويرية كان المفروض تكون أقوى وتسيب علامة معانا لكن للأسف الفيلم كان مستهين تماما بالديكورات والموسيقى التصويرية.
الخلاصة
فيلم Unlocked فيلم قوي ومميز وننصح بمشاهدته لمحبي أفلام الجاسوسية والمؤامرات.
علشان تبقى عارف:
نومي راباس بطلة الفيلم شاركت قبل كده في فيلم Alien: Covenant
