Urge : الشيطان يحكم العالم!
لو كنتم من الناس اللى بتعتبر السينما مجرد مكان لتضييع الوقت أمام أحد الأفلام.. فيلم Urge بيدعوكم للتفكير بشكل مختلف، ومحاولة فك الرموز الموجودة داخل تفاصيل الفيلم ومشاهده المختلفة وتركيز الكاميرا على مشاهد بعينها… صحيح الفيلم ماقدمش ده بشكل جيد لكنه إجتهد وحاول قدر المستطاع.. ده اللى هانعرفه فى تفاصيل موضوعنا عنه.
Urge من بطولة بيرس بروسنان و نيك ثون و بار بالي و اشلي جرين، ومن تأليف جايسون زوموالت و جاي بوسيك وإخراج هارون كوفمان.
الفيلم بيحكي عن مجموعة من الأصدقاء الأثرياء، واللى بيقرروا تقضية عطلة نهاية الإسبوع على أحد الجزر المنعزلة… صديقهم الشبه مجنون بيوعدهم بحفلة غير تقليدية بيقابلوا فيها رجل مجهول الإسم (بيرس بروسنان) بيعطيهم مخدر جديد إسمه (المحفز).. ومن هنا بييجي إسم الفيلم… وبنبدأ نشوف تأثير المخدر ده على الاصدقاء خاصة إنهم بيتلقوا تحذير بخصوص إستخدامه مرة واحدة فقط.. لكن طبعا ماحدش بيهتم بالقاعدة دي.
الفيلم بيتجاوز حدود الحكي عن الأصدقاء والمخدرات وبيتناول فى إسقاطاته علاقة بنى البشر ببعضهم.. وعلاقتهم بالله والشيطان والأخلاق والمبادىء ورسائل كتير بتختفى داخل تفاصيل الفيلم لكن بيتم الإفصاح عنها فى الربع الأخير من الأحداث بشكل شبه رسمي… وبنعرف ساعتها إن صناع الفيلم بيحاولوا يوصولوا رسالة لبني الإنسان إنهم تحولوا من كائنات منتجة وناس طيبة لبشر بتقتل فى بعضها وتنتهك أعراض بعضها وتدوس على بعضها البعض بسبب أمور تافهه، وإن الشيطان بيقود الأرض نحو هلاكها من خلال التصرفات الغبية للبشر وانقيادهم الأعمي وراء شهواتهم ومصالحهم الشخصية.
على الرغم من قوة الرسائل الخفية فى الفيلم إلا أن الأداء التمثيلي مكانش بنفس قوة القصة والحبكة.. حتي بيرس بروسنان واللى قدم شخصية جيمس بوند قبل كده، مقدرش يعمل توازن تمثيلي فى أحداث الفيلم، وبنعتقد إن الإستعانة بيه كانت لوضع إسم فنان كبير على أفيش الفيلم مش أكتر.
المتميز فى الفيلم كان الموسيقي التصويرية الحماسية واللى قدرت تسرقنا من أنفسنا وتدخلنا لعالم الفيلم بمنتهي الأريحية والبساطة.. الديكورات كمان تناغمت مع الإضاءة علشان تخلق حالة من الهيبة خاصة فى مشاهد الحفلة والمشاهد النهائية من الفيلم.
Urge فيلم بيحاول ياخدنا لعوالم غريبة ومظلمة.. الرحلة مكانتش ناجحة بنسبة 100% لكنها مغامرة تستحق المشاهدة والتشجيع.
