Us : أخيرا فيلم رعب يستحق المشاهدة!
الصراحة أننا كنا تعبنا من معظم أفلام الرعب اللي شوفناها النهرده. اما بسبب الفكرة المكررة والتنفيذ الضعيف أو لسبب ضعف المؤثرات الخاصة وعدم وجود كمية رعب مناسبة في الأفلام. لكن فيلم Us قدر يلعب على كل المعادلات دي ويطورها ويقدم فيلم جيد قادر على جذب أنتباهنا. ودي حاجه مش بتحصل كتير في أفلام الرعب مؤخرا.
Us بيحكي عن أسرة بتحاول تقضي وقت ممتع في إجازتها. لكن هجمات مخيفة وغير مفهومة من مجموعة أشخاص غرباء بتحول اقامتهم لجحيم. وبتجبرهم على مواجهة أقوى مخاوفهم في وقت هم في أمس الحاجة للهروب فيه من أي مخاوف أو قلق.
مخرج الفيلم ومؤلفه جوردان بيل هو نفسه مخرج ومؤلف فيلم Get Out ومن الواضح أنه عاوز يأسس لخط أفلام الرعب الخاص به علشان يقدم للمشاهدين تجارب مختلفة ترتقي بتصنيف الرعب اللي اصبح مؤخرا مرادف لمصطلح الأفلام الضعيفة في هوليود.
الأداء التمثيلي لابطال الفيلم كان جيد جدا. بنشوف لوبيتا نيونجو في دور اديلايد و شاهادي رايت جوزيف في دور زورا اللي ادته بشكل جيد جدا. وطبعا شاهادي رايت جوزيف ويحي عبد المتين اللي قدر كل واحد منهم يعكس لنا مشاعر الشخصية اللي بيقوم بها بشكل ممتاز.
ساعد على زيادة جرعة الرعب في الفيلم اعتماد المخرج جوردان بيل على المؤثرات الطبيعية للرعب زي الإضاءة وحركة الكاميرا وزوايا التصوير. بعيدا عن الاعتماد عن مؤثرات الكمبيوتر اللي بتثبت يوم بعد يوم انها مش افضل أسلحة المخرج فيما يتعلق بأفلام الرعب. انتماء جوردان للمدرسة المرعبة القديمة مش بس بيقف عند المؤثرات. لكن كمان اختيار الموسيقى التصويرية واللي كان في حد ذاته مرعب ومؤثر جدا.
مانقدرش نقول أن فيلم Us أفضل فيلم مرعب لـ 2019 مثلا. لكنه واحد من الأفلام اللي ما ينفعش تتفوت لو كنتوا من محبي أفلام الرعب.
