Vacation : كوميديا عائلية فى نهاية الصيف
كان بقالنا فترة طويلة لم نشاهد فيلم فيه القدر ده من الكوميديا الجميلة والمختلفة.. كان بقالنا كتير ماشوفناش فيلم بيسخر من الرحلات والاجازات وتقاليد لم شمل العائلة الامريكية المفككة.. Vacation مش احسن فيلم فى التصنيف الكوميدي.. لكنه فيلم جه على (شوقه) زي ما بنقول فى الامثال العامية.. وده فى حد ذاته يتطلب الاحتفال!
من اخراج وتاليف جون فرانسيس دالى بنشوف محاولة الاب ايد هيلمز او (راستي) انه يعيد شمل عائلته من جديد، فى مكان جديد وباسلوب جديد.. بعد ما بيسمع مراته (ديبي) بتتكلم مع اصحابها عن مدي ضيقتها من تقضيتهم نفس الاجازه كل سنه فى نفس المكان وبنفس الاسلوب..
راستي بيكتشف مع مطالعته للصور انه بالفعل بيقضي كل سنة نفس الاجازه فى كوخ كئيب.. الامر اللى بيخليه يعمل مفجأه لمراته واولاده ويقرر انه ياخدهم لمكان جديد.. مش جديد قوي يعني.. المكان الجديد هو (وايلي وورلد) .. المكان العظيم اللى … مش عاوزين نقول اكتر من كده علشان ده فى صلب احداث الفيلم اللى بيحكي عن المواقف الكوميدية اللى بيتعرض لها (راستي) مع زوجته واولاده فى سبيل الوصول الى هناك.
المقارنة بين التريلر وبين اللى شوفناه على الشاشه بتعرفنا ان فيه كتير من القطع الرقابى اللى تم.. ومش عارفين ازاي ممكن الرقابه تسمح بعرض تريلر فيه مشهد معين ثم تمسح المشهد من الفيلم نفسه! ماهو يا نعرض التريلر والفيلم يا نمسح المشهد من التريلر والفيلم!
الموسيقي التصويرية كانت اكتر من رائعه.. وخصوصا الاغاني اللى تم استعمالها فى احداث الفيلم واللى احنا مصممين على متابعة نزل الموسيقي التصويرية الخاصة بالفيلم علشان نسمع اغاني الفيلم اكتر ونعرف اكتر عن الموسيقي الحماسية الجميلة الى سمعناها خلال الاحداث.
مشاهد مطاردة سيارة النقل للعائلة فكرتنا بافلام تانيه بيتم فيها نفس المطاردة من نفس النوع، لكن فى Vacation تم تقديمها بشكل كوميدي وجميل ومختلف فعلا عن باقى الافلام الى حصرت تقديمها على الرعب والاثارة والاكشن فقط.
Vacation فيلم كوميدي متميز.. ننصحكم بمشاهدته لو عاوزين (تفكوا) دماغكم شويه من هموم الحياة اليومية.
