Vampire Academy: فيلم كوميدي مرعب للمراهقين!
من خلال متابعتنا لعالم السينما، وخصوصًا الإنتاج الهوليوودي الغزير اللى بـ يملأ سوق السينمات سواء فى أمريكا أو فى التوزيع الخارجى لعدد كبير من الدول، بـ نلاحظ أن الأفلام اللى بـ يتم من خلالها استهداف جمهور المراهقين اللى بـ يدرسوا فى الجامعة أو حتى فى المرحلة الثانوية.
Vampire Academy مش بس بـ يستهدف الفئة دى، كمان بـ يستهدف فئة محبى الأفلام المرعبة الكوميدية، وهو المزيج اللى بـ تنفرد هوليوود بتقديمه بدون ما يشعر المشاهد بالتناقض بين الكوميديا والرعب، لكن هل نجح الفيلم فى تحقيق هدفه النهائى؟!
الحقيقة هى لأ! أو يمكن إحنا مش من ضمن الجمهور المستهدف من صناع الفيلم، وكان واضح أن المخرج مارك واترز كان مستهدف جمهور المراهقين بالمقام الأول.
من بطولة زوي ديوتش ولوسي فري وغيرهم بـ نشوف تقديم سينمائى للرواية اللى بـ تحمل نفس الاسم واللى كتبتها ريتشيل ميد واللى بـ يحكى عن روز (زوي دوتش) اللى بـ تلتحق بأحدى الأكاديميات الخاصة بمصاصى الدماء! واللى بـ تأخذنا لعدد كبير من الأحداث اللى بـ تجمع بين الأكشن والرعب أو حتى الكوميديا فى كثير من الأحيان.
مشكلتنا الوحيدة مع أفلام مصاصى الدماء أنه تم عمل كل التيمات الممكنة وغير الممكنة عنها لدرجة شعرنا أننا مش هـ نشوف أفلام لها أفكار جديدة بخصوص التيمة دى، وللأسف Vampire Academy ما قدمش أى جديد بخصوص الفكرة على الإطلاق، اللهم إلا التنويعة الخاصة بموضوع الدراسة الأكاديمية للبنت اللى نصفها مصاصة دماء ونصفها الآخر بشرى.
الموسيقى التصويرية كانت عميقة وحاولت تدخلنا داخل الأحداث، لكن إحساسنا طوال الوقت أن الفكرة مكررة والقصة مستهلكة خلانا نحس أن الفيلم مستهلك لدرجة كبيرة.
Vampire Academy فيلم هوليوودي للمراهقين، تقدر تشوفه لو كان سنك أصغر ودماغك أفضى ووقتك أطول.. أو كنت من محبى أفلام مصاصى الدماء.
