Viral : لا فيلم زومبي ولا فيلم رعب!
مع كل مرة بنشوف فيها فيلم من أفلام الرعب المعتمدة على وجود الزومبي بنسأل نفسنا.. ليه الناس بتحب النوعية دي من الأفلام؟ الإجابة اللى قدرنا نوصل لها بعد وقت محترم من التفكير والتمحيص والتدقيق هى إن الناس بتحب تتفرج على قصص بيكون فيها ناس تانية فى خطر، بينما هم قاعدين فى أمان فى المنزل – او قاعة السينما – معاهم أكلهم وشربهم وتكييفهم – أو الدفاية فى الشتاء – بينما الناس فى الفيلم بتاعني من نقص فى كل الأمور دي… أفلام الرعب أحيانا بتلعب على جانب تقديم كل الحاجات اللى بيخاف منها المشاهد على الشاشة علشان يشعر المشاهد بقدر أكبر من الراحة النفسية! ده اللى حاول صناع فيلم Viral يعملوه… وده اللى فشلوا فيه فشل ذريع!
Viral من إخراج هنري جوست وبطولة صوفيا بلاك دي ايليا و اناليج تيبتون و مايكل كيلي، وبيحكي الفيلم عن فيروس غريب بيصيب السكان فى أحد الولايات الأمريكية.. الفيروس بيغير من شكل المصابين وسلوكهم وبيدفعهم لمطاردة الأصحاء ومحاولة إصابتهم بالعدوي.. من مدرسة أمريكية الى باقى منازل المدينة بتبدأ العدوي بالإنتشار بسرعة البرق، الفيلم بيستعرض بالإضافة لمحاولة السيطرة على العدوي، محاولة شقيقتين البقاء على قيد الحياة وعدم التعرض للعدوي.
عندنا حيرة كبيرة بخصوص تصنيف الفيلم فى منطقة ما من مناطق أفلام الرعب… فى البداية كان عندنا اعتقاد إننا أمام فيلم رعب تقليدي من عينة الأفلام اللى كلها تلاعب بالصوت والظهور المفاجىء للأبطال أمام الكاميرا، لكن مع الوقت بدأ الفيلم ياخد شكل رعب الزومبي، ومع ظهور مشاهد الدماء وإطلاق الرصاص بدأنا نشعر أننا أمام فيلم رعب معوي قائم على الدم والذبح وخلافه… وفى النهاية توصلنا لقرار إن الفيلم حاول يقدم كل أشكال الرعب وفى النهاية فشل فى تقديم أى شىء، وفشل حتي فى تقديم نهاية جيدة لأحداثه.
الأداء التمثيلي للأبطال كان ضعيف وغير متقن فى معظم حالاته، على الرغم من إن كل المطلوب كان تقديم انفعالات الرعب والهلع أو الغضب على الوجوه، وبنعتقد إنه تم الزج بإسم مايكل كيلي ضمن أبطال الفيلم لضمان وجود إسم قديم وقوي فى فريق عمل الممثلين، ومش عارفين إزاي فنان بحجم كيلي يقبل يقوم بدور هامشى وضعيف زي الدور اللى شوفناه، خاصة بعد مشاركته فى مسلسل متميز وناجح تم عرضه على شبكة Netflex زي House Of Cards
على الرغم من إن معظم ديكورات الفيلم كانت بتدور فى مشاهد تصوير داخلية، إلا أن الديكورات بشكل عام قدرت تدخلنا الإطار العام للأحداث بسهولة ويسر وده شىء يحسب لها، لكن الموسيقي التصويرية على العكس من الديكور كانت باهته وتقريباً مش حاسين بتأثيرها على الإطلاق مع إننا بنشعر أن الموسيقي التصويرية أحيانا بيقع عليها عبء الرعب فى الفيلم بنسبة لا تقل عن 40% مثلا.
صناع فيلم Viral كان عندهم نية تقديم فيلم جيد، لكن مين قال إن النوايا الحسنة وحدها قادرة على تقديم فيلم جيد فعلا؟ للأسف الفيلم لا يصلح سوي لمشاهدة سريعة فى منتصف الإسبوع كنوع من أنواع تضييع ساعتين من الزمن والسلام.. قولوا لنا فى التعليقات عن رأيكم فى أفلام الزومبي، وهل فعلاً بتحبوا النوع ده من أفلام الرعب؟ وليه؟
