Vox Lux : الحوادث ممكن تخلق نجوم موسيقى!
على الرغم من المشاكل النفسية والمادية اللي بتسببها الحوادث الضخمة، إلا أنها ممكن تتسبب في ظهور وسطوع نجوم في مجال الغناء والموسيقى. هي دي المفارقة الأساسية اللي بيحكي عنها فيلم Vox Lux وبيبدأ بيها المشهد الافتتاحي للفيلم.
في بداية أحداث Vox Lux بنشوف حادث إطلاق نار في أحد المدارس في أمريكا. الحادث بينتج عنه بعض الضحايا اللي بيتم تكريمهم من خلال حفلة كبيرة. ومن خلال الغناء في الحفلة بيسطع نجم (سيليست) اللي بتقوم بدورها ناتلي بورتمان. وبتبدأ مشوار فني بيتقاطع مع عدد كبير من الأحداث الإنسانية والإجتماعية.
من أهم عوامل قوة الفيلم من وجهة نظرنا. الأداء التمثيلي المميز اللي بيقوم بيه كل أفراد الفيلم تقريبا. وعلى رأسهم طبعا ناتلي بورتمان صاحبة دور البطولة، واللي قدرت تأدي دور مميز يعتبر استمرار لسلسلة من الأدوار القوية والمميزة اللي قدمتها في السينما لفترة طويلة من تاريخها الفني القوي.
لكن مع الأداء القوي لناتلي بنشوف كمان أداء مميز من جود لو واللي قدر مخرج ومؤلف الفيلم برادي كوربيت إنه يوجه أبطال فيلمه علشان يقدم بيهم في النهاية فيلم مميز على صعيد الأداء الدرامي أو حتى الأداء الموسيقي والغنائي. على الرغم من تاريخه الحديث نسبيا فيما يتعلق بالإخراج السينمائي.
الجميل في الفيلم انه قدر يربط بين ظاهرة منتشرة بقوة في العالم الغربي الفترة الأخيرة، وهي حوادث إطلاق النار في المدارس والجامعات، وبين صعود مطربة حتى قمة عالم الغناء. والمشاكل اللي بتلازم النجاح والشهرة. كل ده وسط ابهار بصري وأداء تمثيلي مميز جدا.
لكن على الرغم من الإنطباعات الجيدة اللي خرجنا بيها من الفيلم. لقينا بعض المشاهدين متضايقين جدا من الفيلم. وده أثر على تقييم الفيلم على موقع زي IMDB. ولاحظنا أن أراء مستخدمي الموقع على الفيلم بتتراوح ما بين كاره له تماما -بسبب تتابع الأحداث بالقرب من نهاية الفيلم- أو محب له بنسبة 100%. والحقيقة أن Vox Lux من الأفلام اللي تجبر المشاهد إما على أنه يشوفه فيلم رائع ومميز أو يشوفه فيلم فاشل جدا. مافيش هنا حلول وسط.
Vox Lux في رأينا فيلم جيد ويستحق المشاهدة وفيه أداء تمثيلي وموسيقي عالي جدا ومحترف.
