We Die Young: الفيلم ضحك علينا بمشاركة فان دام!
لسه فاكرين لحد النهردة أفيش فيلم معالي الوزير بطولة أحمد زكي. لما تم وضع اسم يسرا وصورتها علشان تظهر كأنها بتشارك زكي البطولة. لكن الحقيقة أنها كانت ضيفة شرف في الفيلم!
هو ده اللي افتكرناه واحنا بنشوف فيلم We Die Young واللي دخلناه على أساس انه من بطولة فان دام لكن الحقيقة أن البطل مكانش فان دام!
We Die Young بيحكي عن تورط ٢ من الشباب الصغيرين في عالم تجارة المخدرات في الشوارع الخلفية لواشنطن العاصمة. وفي محاولة هروبهم من العصابة بيساعدهم جارهم دانيال (قام بالدور فان دام) واللي له ماضي عسكري غامض أثناء المشاركة في الحرب الأمريكية الأفغانية.
زي ما قولنا مساحة دور فان دام أو حتى المشاهد العنيفة اللي بيقوم بها لا تتعدى ١٪ من الفيلم ككل. وده خلانا نحس أنه انضحك علينا وكان المفروض يتقال لنا أن فان دام مش هو بطل الأحداث.
وإن كنا قبلنا موقف زي ده من فيلم زي معالي الوزير بسبب قوة أحداثه. لكن We Die Young ماقدمش لنا أحداث قوية أو قصة مترابطة. وحتى فشل في تقديم أكشن جيد أو سيناريو محبوك بشكل جيد. ودي كانت غلطة المخرج والمؤلف ليور جيلر
يمكن الحاجة الوحيدة المختلفة في الفيلم هي قدرته على تجسيد عالم الشوارع الخلفية لمدينة واشنطن. وانها من المرات النادرة اللي بتظهر فيها كمدينة جرائم وتجارة مخدرات مش عاصمة جميلة وحديثة زي ما متعودين نشوفها.
لو ناويين تتفرجوا على We Die Young حطوا في بالكم أنه مش من بطولة فان دام. وأن مشاهد الأكشن اللي فيه مش بالقوة اللي بيوعدكم بيها التريلر. علشان ما تشعروش بخيبة الأمل زينا.
