Welcome Home: دراما نفسية معقدة
أحيانا نتفرج على فيلم ونبقى مش عارفين هل نصنفه في دايرة أفلام الرعب. أم الأكشن. أم الرومانسية أم الغموض. تعالوا نتعرف أكتر على فيلم Welcome Home ونشوف مع بعض ممكن نصنفه في أي تصنيف من الأفلام دي؟
Welcome Home بيحكي عن زوجين بينهم مشاكل كتير. وبيقرروا يسافروا للريف الإيطالي علشان يقضوا الويك إند هناك، في محاولة منهم لتصحيح علاقتهم وإرجاعها تاني للطريق الصحيح. لكن في أجازتهم بتبدأ بعض المشاكل غير المتوقعة من مالك المنزل واللي بيتصرف بطريقة مريبة ومثيرة للشكوك.
المميز في قصة الفيلم واللي كتبها ديفيد ليفنسون أنها تنفع يتم تقديمها كفيلم رعب نفسي، أو كفيلم عاطفي مع صراع فيه أكشن. أو حتى كفيلم بتغلب عليه الحوارات الطويلة والمشاهد اللي بيتم تركها للمشاهد علشان يخرج بانطباعه أو تفسيره الشخصي لها.
وعلشان يتم تقديم فيلم بالمواصفات دي بشكل كويس. كان لازم المخرج جورج راتليف يختار فريق عمل الفيلم بشكل صحيح.
علشان كده بنشوف في البطولة أرون بول. واحد من أشهر الأسماء في عالم الفن خاصة بعد مشاركته الأكثر من مذهلة في مسلسل Breaking Bad اللي بيعتبر من أشهر وأنجح المسلسلات في التاريخ إن لم يكن أشهرها بالفعل.
وعلشان المعادلة تكتمل بنشوف في الكفة التانيه ريكاردو سكامارشيو والمعروف عندنا في المنطقة العربيه بدوره في فيلم John Wick: Chapter 2. وطبعا لا يمكن ننسى البطولة النسائية ممثلة في إميلي راتاجكوسكي واللي شاركت في فيلم تاني قوي هو Gone Girl سنة 2014
بنلاحظ في الفيلم أن الأحداث بيتم تقديمها من خلال حوارات طويلة نسبيا. ومن خلال الحوارات دي بيبدأ السيناريو في التطور ودفعنا لنقطة التصادم. وهنا كان لازم السيناريو يكون ممتع وواضح وغير ممل في نفس الوقت وهي مهمة صعبة قدر صناع الفيلم يقوموا بيها بشكل جيد وناجح.
كمان من الأمور المميزة في الفيلم اختيار أماكن التصوير وزوايا الكاميرا وطريقة حركة الكاميرا علشان تجيب لنا بعض المشاهد بنجاح مؤثر.
تصنيفنا لفيلم Welcome Home إنه فيلم دراما نفسية معقدة مع خط من الأكشن وبعض الرومانسية والمشاهد العاطفية. لو شوفتوا الفيلم قولونا تصنيفكم له كان ايه؟
