Welcome to Willits: الهروب من الزومبي بشكل ضعيف

تيمة أفلام الهروب من الزومبي واحدة من أكتر تيمات الأفلام تحقيقا للنجاح. على الأقل في الولايات المتحدة الأمريكية. وعلى الرغم من قلة نفس الحبكة في تحقيق نفس النجاح في المنطقة العربية لكن لازال تقديم الأفلام اللي من النوعية دي مستمر وقائم. صناع Welcome to Willits حاولوا تقديم نفس التيمة لكن على أساس وجود مخلوقات غريبة مش الموتي الأحياء. هل نجحوا في التجربة؟

Welcome to Willits بيحكي عن محاولة مجموعة من الأشخاص اكتشاف غموض اختفاء كتير من الأشخاص في أحد غابات ولاية كاليفورنيا الأمريكية.

الحقيقة أن المخرج والمؤلف تريفور ريان كان عنده النية والرغبة في تقديم فيلم ناجح وقوي، لكن مين قال أن معايير السينما متوقفة فقط على النوايا الطيبة! الحقيقة أن الفيلم ظهر بشكل ضعيف ومهلهل وحسينا بالملل أثناء مشاهدة الأحداث وكنا بنتمنى اللحظة اللي ينتهي فيها الفيلم.

بداية من الأداء التمثيلي الضعيف من أبطال الفيلم بيل ساج وروري كولكن و انستازيا بارانوفا واللي على الرغم من محاولتهم تقديم أداء قوي الا أن الأداء التمثيلي الخاص بهم وبباقي الابطال كان ضعيف على الرغم من أن أفلام الرعب من النوع ده مش بتكون متطلبه كتير من المهارات التمثيلية.

ولو كان الأداء التمثيلي ضعيف قيراط فالمؤثرات الخاصة كانت ضعيفة 24 قيراط. والمونتاج قدم تجربة سيئة جدا لينا كمشاهدين، الأمر اللي جعل عيوننا متعلقة بمتابعة أخطاء التصوير أكتر من متابعة أحداث الفيلم نفسه. وبشكل عام خرجنا بانطباع سىء عن الفيلم.

لو هانرشح Welcome to Willits للمشاهدة، هانرشحه للشباب اللي بتعشق أفلام الزومبي على الرغم من مستواها، واللي بيحبوا أفلام الهروب من الكائنات الغامضة والغريبة مهما كان مستواها الفني

علشان تبقى عارف: تقييم الفيلم على موقع IMDB هو 4.4 من 10