What Men Want : هل احنا فعلا عايشين في عالم ذكوري؟!
نقدر نقول أن فيلم What Men Want هو نتاج حالة من السيطرة الأنثوية على قصص وحبكات الأفلام. بالتزامن مع سلسلة من فضائح التحرش اللي تورط فيها أسماء شهيرة وكبيرة في هوليود.
من بعدها بدأت هوليود في تقديم أشهر أعمالها من جديد مع وجوه أنثوية زي فيلم Ocean’s 8 واللي يعتبر إعادة انتاج لفيلم Ocean’s Eleven لكن بممثلات بدل الممثلين الأصليين. وغيره من الأعمال اللي بيعتبر What Men Want من ضمنها.
الفيلم بيحكي عن ألي ديفيز أو تراجي بي. هينسون اللي بتعمل في مهنة بيسيطر عليها الرجال. ومش بتقدر تحقق أي تقدم في حياتها الوظيفية للسبب ده. لكن كل الأمور بتتغير لما بتتعرض لحادثة بتخليها قادرة على قراءة أفكار الرجال. هل هاتقدر تستغل موهبتها الجديدة لصالحها؟
على الرغم من أن الفيلم مقتبس من حيث القصة من فيلم What Women Want لكن من الصعب مقارنة أداء ميل جبسون بأداء تراجي بي هينسون. اللي على الرغم من كونه أداء كوميدي لكن تكرار حبكة وقصة الفيلم جعلتنا قادرين على استنتاج 90% تقريبا من الأحداث. وده أضر بالفيلم بشكل كبير.
من مميزات الفيلم أنه ملىء بالمواقف الكوميدية اللي كلها بتسلم بعضها بحيث لا يشعر المشاهد بالملل على مدار الأحداث أبداً
على الرغم من أن الأفلام الكوميدية مش بتركز في الغالب على صناعة كادرات جميلة، لكن المخرج آدم شانكمان قدر يصمم كادرات جميلة ومميزة وتقدر تخطف وتشد العين لها. وكان من المميز أننا نتفرج على الفيلم واحنا مرتاحين بصريا لتفاصيل المشاهد.
لو كنت من محبي اللعب على نفس وتيرة الأفلام الكوميدية القديمة بدون أي تجديد يُذكر. في الحالة دي فيلم What Men Wantهايحوذ على أعجابكم