Whiplash : الدق على الطبول.. والمشاعر

على الرغم من حصول الفيلم على اوسكار افضل ميكساج صوت… مش عارفين ازاى لم يتم ترشيح الفيلم لنيل جوائز اخري؟! على الرغم من الحالة النفسية المتميزة اللى بيقدر الفيلم يجذبنا لها بداية من المشهد الأول، وحتي نهاية الأحداث.

من تأليف وأخراج دامين شازيل بنشوف جى كي سيمونز و ميلز تيلر فى فيلم بيتكلم عن الارادة الحديدية، والاساليب الصعبة فى التعليم والتدريب.

الفيلم بيحكي عن طالب متفوق وموهوب جدا فى مجال العزف على الطبله (الدرامز)، الامر اللى بيدفعه للتدريب تحت يد مدرب لا يعرف الرحمة، ويسعي طوال الوقت للكمال، الامر اللى بيدفعه لتدريب الطلبه تحت يده باساليب غاية فى الغرابة والشدة، وتصل فى بعض الاحيان للضرب والصفع او حتي رمي الاشياء فى الوجوه! الأمر اللى بيدفع الطالب النجيب للتدريب طوال الوقت للوصول لرضا استاذه.

بداية من التدريب حتي نزيف اليد، ونهاية بتركه لحبيبته علشان يقدر يتفرغ للتدريب، بيضرب (اندرو) اكبر مثال على كيفية اخلاص انسان فى سبيل الوصول للهدف اللى عاوز يوصل له، حتي لو كان العائق وراء الهدف ده مدرب بحجم وثقل (فليتشر) اللى لعب دوره العبقري (جي كيه سيمسونز) فى واحد من افضل ادواره على الاطلاق فى دور الأستاذ المحترف المدفوع بسمعته المتميزه فى المجال الموسيقي واللى بسببها عاوز يوصل لحدود الكمال فى الأداء.

من الصعب اننا ننتقد الموسيقي التصويرية فيما يتعلق بفيلم حاصل على الاوسكار فى ميكساج الصوت، بالاضافه لموضوع الفيلم اللى اجبر صانعيه على التدقيق والتركيز فى تفاصيل صوت الفيلم ومزج الخلفيات الموسيقية بالاحداث، الامر اللى تم تنفيذه باحترافيه وادء اكثر من رائعين استحقوا عليه فعلا جائزه الاوسكار، وان كان نفسنا نشوف الفيلم بينافس على المزيد من الترشيحات والجوائز.

ديكورات الفيلم كمان كانت متميزه وقوية، واختيار الالوان واساليب الاضاءة كان متناسب مع الجو العام للاحداث والتقلبات النفسية اللى بيمر بيها الابطال طوال الوقت بشكل بيخلينا احنا كمشاهدين قاعدين على حافة التوتر طوال الوقت وفى انتظار التقلب الجديد.

(ويبلاش) فيلم متميز للشباب. يعلمنا ويعلمهم الاصرار على الهدف مهما كان صعب.. ومهما كان الطريق اليه مرصوف بالدقات على الطبول.. أو الأجساد أحيانا!