Why Him : كوميديا الأب والعريس!

ايه أسهل الطرق علشان تقدم فيلم كوميدي؟ هات مجموعة من الاشخاص اللى على طرفي نقيض، وقدم حوار ومشاهد معتمدة فى جزء منها على البذاءة والإيحاءات الجنسية.. والنتيجة؟ ضحك متواصل لحوالى ساعتين، لكن بدون أي جديد  على مستوي الأحداث أو السيناريو أو باقى عناصر صناعة أي فيلم ناجح!

Why him من إخراج جون هامبورج ومن بطولة بريان كرانستون و  جيمس فرانكو و  زوي ديوتش   و زاك بيرلمان و  كيسي ويلسون و أندرو رانيلز وبيحكي عن قصة أب متمسك بالقيم والعادات والتقاليد، أو ممكن نقول إنه أب محافظ شويتين تلاته.. واللى بيسافر مع أسرته علشان يقابل بنته اللى بتدرس فى جامعة ستانفورد.

فى الزيارة بيقابل الأب صديق الإبنة الحميم، واللى –على النقيض من الأب تماما- مافيش كلمة بتخرج من فمه بدون ألفاظ بذيئة، وكل تصرفاته بتسبب إحراج شديد لكل الموجودين تقريبا طوال الوقت، وطبعا الموضوع ده مش بيعجب الأب أبداً، واللى بيحاول بكل الطرق تدمير العلاقة بينه وبين ابنته، وبالتالى بتتفجر مجموعة من المواقف الكوميدية اللى مش بتنتهي.

نقدر نعتبر الفيلم للكبار فقط بسبب كمية الإيحاءات الجنسية والألفاظ الخادشة للحياء، ونقدر نعتبر الفيلم كله كنكتة (قبيحة) بتخلى الناس تضحك لكن فى نفس الوقت مش بتقدم جديد… وكان من الواضح أن معظم مشاهدين الفيلم قدروا يكونوا الفكرة دي من خلال تريلر الفيلم، وكانوا عارفين انهم داخلين الفيلم لمجرد مشاهدة ساعتين من الضحك والمرح وخلاص.

ديكورات الفيلم كانت مكررة ومحفوظة، وعلى الرغم من المجهود اللى كان واضح فى تنفيذ المشاهد لكننا حسينا الديكورات مكررة ومقتبسة من أفلام أخري، لكن مانقدرش ننكر أن الموسيقي التصويرية الحماسية والمتميزة كانت مسيطرة على الأحداث وقدرت تعوض ضعف الديكورات.. ولازم نقول أن فى الأفلام الكوميدية بتكون بعض العناصر زي الديكورات وحركة الكاميرا وتصميم المشاهد وغيرها من العناصر المتخصصة فى صناعة الفيلم، العوامل دي مش بتكون مهمة أو مؤثرة قوي. بس كان لازم نلقى عليها الضوء.

مانقدرش نسيب فيلم why him بدون ما نتذكر فيلم عريس من جهه أمنية من بطولة عادل إمام وشريف منير وحلا شحيه، واللى كان بيحكي عن أب بيحاول يدمر زواج بنته من ظابط فى جهه سيادية بيتمتع بكل مواصفات العريس الجيد، لمجرد أن الأب بيغير على ابنته ومش عاوزها تعيش مع أي شخص غيره!

كان ممكن نقول أن الفيلم الأجنبي اقتبس الفكرة من فيلمنا العربي، زي ما بيتردد عن فيلم أخر للزعيم هو (عصابة حماده وتوتو) اللى بيقال ان الفيلم الأجنبي (Fun with dick and jane) مقتبس عنه، لكن الحقيقة أن تيمة  الأب الغاضب من عريس الإبنة اتكررت فى أفلام كتير زي Father of the Bride على سبيل المثال.

علشان تبقى عارف:

• الفيلم حقق ايرادات 16 مليون دولار واحتل المرتبة الرابعة فى البوكس اوفيس الأمريكي.
• أقيم عرض خاص للفيلم فى ولايةكاليفورنيا.