Widows : وراء كل مجرم عظيم…إمرأة!
تفتكروا ايه اللي ممكن يسيبه زوج لزوجته بعد وفاته؟ فلوس؟ أملاك؟ وصية علشان تعيش حياتها بشكل أفضل؟ الحقيقة أن ليام نيسون ترك لزوجته فيولا دافيس خطة إجرامية علشان تنفذها بنفسها! وهو ده المحور الرئيسي اللي بيدور عليه فيلم Widowsواحد من أفضل الأفلام في 2018
المميز في الفيلم مش القصة بس. لكن كمان فريق العمل. يكفي أننا نقول أن الفيلم هو أول فيلم للمخرج ستيف ماكوين من بعد فيلمه 12 Years A Slave، اللي حصل على ثلاث جوائز أوسكار عام 2014.
أما عن التأليف فالفيلم من تألف ستيف ماكوين وكاتب Gone Girl جيليان فلين، وكمان بيشارك في بطولته كولين فاريل، ودانييل كالويا، وميشيل رودريجاز، وجون بيرنثال، وروبرت دوفال، وإليزابث ديبيكي، وسينثيا إريفو.
فيولا ديفيس في الفيلم ده بتأكد على تفردها كواحدة من أهم بنات جيلها سينمائيا. وده مش غريب على ممثلة قدمت لنا قبل كده دور مميز في فيلم Fences ودور عمرها في فيلم The Help اللي بيعتبر من أعذب الأفلام اللي قدمتها هوليود في تاريخها.
ويكفي أننا نراقب انفعالات جسمها ولغة جسمها body language واللي بتتطور مع تطور شخصيتها على مدار أحداث الفيلم. تفاصيل صغيرة زي دي محتاجه ممثلة عبقرية علشان تقدر توصلها للمشاهدين.
أما ليام نيسون فأبدع في تقديم المشهد الإفتتاحي للفيلم. ونيسون واحد من المتخصصين في أفلام الأكشن والمغامرة، وحفر إسمه بحروف من دهب في مجموعة من أفضل أفلام هوليود زي Schindler’s List على سبيل المثال.
من الأمور المميزة في الفيلم هي أنه مش بس بيقدم مغامرة ومشاهد قوية بس. لكن القصة قابلة للتفسير على أكتر من مستوى وفي أكتر من إتجاه. ومهما كان عمر المشاهدين أو ميولهم السينمائية هايلاقوا في الفيلم مشاهد تعجبهم وحبكة تنول رضاهم
إسلوب التصوير واختيار الكادرات في الفيلم كان مميز، وده ساعد الممثلين علشان يقدموا أفضل ما عندهم بسهولة وبطريقة توصل للجمهور وتسمع عندهم علطول. ولا يمكن ننسى الموسيقى التصويرية اللي ساعدت على إخراج مشاهد كاملة بشكل مبهر لينا كمشاهدين.
خلاصة الكلام… Widows فيلم مميز، وبنعتبره مفاجأة جميلة في ختام 2018 السينمائية.
