Winter’s Tale: سبوبة عيد الحب.. حتى بعد انتهاؤه
الحقيقة أن موسم عيد الحب هو الموسم اللى بـ يتم طرح الأفلام الرومانسية والعاطفية فيه، بعض الأفلام بـ يكون قوى ويستحق يتم عرضه، والبعض الآخر بـ يكون مجرد استغلال للحالة الخاصه بعيد الحب وحالة الرومانسية اللى بـ تكون عند الجميع فى الأيام دى، عيد الحب عند السينمائين مش مجرد يوم.. هو فترة بحالها… حالة بحالها.
من إخراج وتأليف عكيفا جولدسمان وعن رواية لمارك هيلبرن بـ نشوف كولين فارل، مات بومر، ولوسى جيفتش فى دراما رومانسية فانتازية عن قصة شبه قصص ألف ليلة وليلة والروايات الأسطورية مصحوبة بكثير من الفانتازيا والخيال العلمى، بصراحة شديدة إحنا حسينا أننا أمام “سبوبة” هوليوودية لاستغلال موسم عيد الحب لعمل فيلم رومانسى والسلام.
الموسيقى التصويرية والديكور كانوا ممتازين، كمان الخدع السينمائية كانت جميلة وموظفة فى مكانها المناسب، لكن كثير من العناصر دى حسينا أنها كان ممكن تكون أفضل لو كان تم استغلالها فى فيلم رومانسى للرومانسية مش لمجرد اللحاق بالسينمات فى الفلانتاين أو بمعنى أصح إحساسنا بالعنصر التجارى فى فيلم عاطفى خلانا نحس بـ “القفلة” من الفيلم بالكامل.
كولن فاريل شوفناه قبل كده فى أكثر من عمل، لعل آخرهم كان Saving Mr. Banks وما نقدرش ننسى دوره في فيلم زى Alexander وغيره من الأعمال، أداؤه التمثيلى فى Winter’s Tale كان كويس لكن ما نقدرش نقول عليه ممتاز، ما نقدرش نقول أنه واحد من أحسن أدواره على سبيل المثال، طوال الوقت كنا حاسين أن فيه أداء تمثيلى أفضل من كده، والكلام ده ينطبق على باقى الفنانين فى الفيلم.
Winter’s Tale فيلم رومانسى لطيف ممكن تشوفوه بمناسبة أعياد الحب، لكن لو متوقعين أكثر من كده ما ننصحكوش بمشاهدته وننصحكم بمشاهدة أى عمل آخر.
