Within: فيلم غير مبتكر عن منزل مسكون
لما يفكر مجموعة من منتجي أفلام الرعب فى هوليود أنهم ينتجوا فيلم عن منزل مسكون، لازم يكونوا قسم من 2.. الأول أنهم يكونوا بيعملوا (سبوبة) وعاوزين يقدموا فيلم فيه شوية مشاهد مرعبة وخلاص، والثاني أنهم يكونوا بيقدموا واحد من أحسن وأقوي أفلام الرعب فى العالم.. ليه؟ علشان مجال أفلام البيوت المسكونة أصبح مكرر جدا، وأصبح صناع النوعية دي من الأفلام مطالبين إما بتقديم فيلم خارق الروعة، أو الإكتفاء بتقديم نسخة من أفلام تانية والسلام.
فيلم Within من إخراج فيل كلايدون وتأليف جاري دوبرمان وبطولة نادين فيلزاكوز و توم رايت و ميستي أوفام و إيرين موريارتي و بليك جينر و دوريان كينجي.
الفيلم بيحكي عن رجل فقد زوجته من فترة، وبينتقل هو وابنته لمنزل جديد فى منطقة هادية علشان يريحوا أعصابهم وينسوا الماضي بكل ألامه، لكن المنزل الجديد بيخبي لهم مفجأة مش على البال لما بيكتشفوا ان المنزل مسكون بكيان شرير بيحول حياتهم لجحيم.
زي ما احنا شايفين القصة مكررة و مهروسة فى ألف فيلم قبل كده، السيناريو والحوار ماقدموش أي جديد، علشان القصة نفسها مكررة ومافيشها جديد، بالتالى لكم أن تتخيلوا قدر شعورنا بالملل أثناء مشاهدة الفيلم، ولما نقول أننا شعرنا بالملل فى فيلم رعب، ده يعتبر شهادة وفاة للفيلم! خاصة لما يتضافر التكرار مع الأداء التمثيلي الضعيف والمبالغ فيه فى بعض المشاهد.
معلومة على الطاير: تقييم الفيلم على موقع rottentomatoes 38% والفيلم واخد تصنيف رقابي R
طبعا لما يكون مستوى السيناريو والحوار والقصة بالشكل ده، بلاش ننتظر كتير من الديكورات والموسيقى التصويرية.. الموسيقى فعلاً كانت ضعيفة أما الديكورات فتعتبر جيدة مقارنة بباقي عناصر الفيلم. لكن من امتي بتصنع الديكورات وحدها فيلم رعب جيد!
Within فيلم رعب غير مبتكر ومكرر، وننصح بيه مهاويس أفلام الرعب اللى بيتفجروا على أي فيلم رعب فى السينما.
علشان تبقى عارف: الفيلم حصل على تقييم 5.3 من 10 على موقع IMDB وشارك فى التصويت حوالي 1000 مستخدم للموقع.
