Wonder: فيلم يخليك تعيد النظر في تعريفك للجمال!
هل سألنا نفسنا قبل كده عن تعريفنا للجمال؟ هل الجمال هو جمال الشكل فقط أم جمال الروح؟ وهل إجابتنا على السؤال ده إجابة حقيقية نابعة من تفكير عميق ومصارحة مع النفس، أم أنها إجابة لزوم إننا نظهر متحضرين ونموذجيين أمام الأخرين؟!
القصة
فيلم Wonder بيحكي عن طفل صغير بيولد بتشوهات في وجهة، وبيجري عدد كبير من العمليات الجراحية في وجهه، لكن العمليات بتتركه بعلامات صعبة على وجهه، ولما بينتقل لمدرسة جديدة فيها أطفال عاديين، بيبدأ يواجه الخوف والتنمر والتريقة من الجميع. هل هايقدر يتغلب على كل المعوقات دي؟
فريق العمل
الفيلم من إخراج ستيفن تشبوسكي ومن تاليفه أيضا، أما البطولة فكانت من نصيب جوليا روبرتس و أوين ويلسون و جاكوب ترمبلي و ماندي باتينكين و سونيا براجا و إيزابيلا فيدوفيتش.
الأداء التمثيلي
جوليا روبرتس قدرت تقوم بدور قوي ومناسب جدا لسنها ولقدراتها التمثيلية العالية، أما البطل الحقيقي للفيلم فكان الطفل العبقري والمميز جاكوب ترمبلي،ودي مش أول مرة يعمل دور قوي ومميز، وسبق له قبل كده أنه قام تقريبا ببطولة فيلم Room اللي حقق نجاح جماهيري ونقدي كبير.
السيناريو والحوار والأخراج
سيناريو الفيلم بيركز على حياة أوجي والتحديات والصعوبات اللي بتواجهه في حياته، وقدر السيناريو القوي أنه يخلينا نتعاطف معاه من البداية للنهايه، وتضافر مع السيناريو القوي الإخراج المميز اللي ركز طوال الوقت على مشاعر أبطال الفيلم واهتم بالمشاهد القريبة من الوجوه علشان يعكس لنا الحالة النفسية لكل بطل من أبطال الفيلم.
الديكورات والموسيقى والأزياء
ديكورات الفيلم كانت عادية وما حسيناش فيها بأي تجديد أو اختلاف. أما الموسيقى التصويرية والخدع والمكياج فكانت أكتر من رائعة ولا يقل دورها عن دور الممثلين أو المخرج كمان، وبنخص هنا طبعا مكياج بطل الفيلم اللي قدر ينقل لنا حالته الجسديه بشكل مؤثر ورائع.
الخلاصة
فيلم Wonder فيلم متميز وقوي لكن مش بننصح بمشاهدته للناس اللي دموعها قريبه أو اللي قلبها رهيف علشان بجد هايتعبوا جدا من مشاهدته.
علشان تبقى عارف:
تقييم الفيلم على موقع IMDB 8.1 من 10
