X-Men: Apocalypse : الرجال اكس بنكهة مارفل!
لو سألتونا عن إسم مناسب لسنة 2016 سينمائيا… على الأقل لحد دلوقت هانسميه عام الـ Super Heros بلا منازع… تقريباً إحنا مش بنعمل حاجه غير اننا نتفرج على أفلام super heros كل إسبوع فى السينما!
من إخراج براين سينجر وبطولة هيو جاكمان ومايكل فاسبندر و روز بيرن و جنيفر لورانس، بنشوف مغامرة جديدة للرجال اكس… وبنرجع معاهم زمنيا للثمانينات ومكانياً الى مصر.. علشان نشوف إزاي بدأت قصة العدو المتحول (ابكاليبس) وجذور كراهيته للفريق ومحاولته تدمير العالم كله. ومحاولة فريق X السيطرة عليه وتحجيمه ومنع مخططاته الشريرة.
عجبنا فى الفيلم الابهار والمؤثرات الخاصة واللى قدرت تنقلنا لعالم تاني لمدة حوالى 3 ساعات.. عالم تاني بمعني الكلمة.. عالم من المتعة والاثارة والابهار البصري المتميز.. لكن هل كان الابهار فى التمثيل والاداء بنفس قوة الابهار فى المؤثرات؟ الاجابة هى لا.. فى حقيقة الأمر الأفلام المعتمدة على الابهار والتقنيات العالية فى المشاهدة بتكون مساحات التمثيل فيها اقل بكتير من المتوقع، فما بالكم لو كان فيلم super heros يعني معتمد بالمقام الأول على الخدع البصرية بأكتر من الإعتماد على الاداء التمثيلي؟!
هل معني كده ان الفيلم مكانش فيه تمثيل؟ علشان نكون حقانيين لازم نقول ان الفيلم كان فيه بعض المشاهد التمثيلية الجيده، لكن كلها تتعد على الصوابع فى النهاية، وده مش التمثيل اللى كنا نتوقعه من فيلم بالمستوي الانتاجي والبصري ده.
الفيلم بيتبع اسلوب (مارفل) فى تقديم الشخصيات وفى طريقة دخولهم لسيناريو الأحداث، لكننا زهقنا من بعض التطويل وبعض العودة فى الأحداث لتقديم تفسيرات على مستوي السيناريو الجديد، وحسينا ان المؤلف بيلوي دراع الأحداث علشان يوصل للى عاوزه فى الجزء الجديد.
الموسيقي التصويرية كانت متميزة وقوية الى اقصى حد.. الديكورات كمان كانت بتعبر عن كل فترة زمنية بشكل متميز ورائع، وبشكل عام انتاج الفيلم كان سخي ومهتم بالتفاصيل، وفاهم كل جزئية فى السلسلة كويس وقادر يخدمها بشكل رائع.
اخر ملاحظاتنا على الفيلم : لو كنتم من عشاق سلسلة Xmen الفيلم هايعجبكم مع بعض التحفظات والمقارنات بين الجزء ده والأجزاء السابقة، ولو كنتم بتتفرجوا على السلسلة لاول مره ماتخافوش هاتقدروا تفهموا الأحداث، لكن ننصحكم بمشاهدة الأجزاء السابقة علشان استمتاعكم يوصل لاقصى مدي له.
