xXx: The Return of Xander Cage :كله ضرب.. مافيش شتيمة!

لما تكون شاطر فى تقديم توليفة سينمائية ما، هوليود بتقول لك استمر فى تقديمها مرات ومرات ومرات، وفى كل مرة هايكون النجاح حليفك علشان طوال الوقت الجمهور بيحب يتفرج علي أجزاء جديدة من أعمال سابقة، وكلها بتحمل تقريباً نفس الحبكة.

فيلم xXx: The Return of Xander Cage يعتبر من أكتر الأمثال الصارخة على النظرية دي.. نقدر نقول بضمير مستريح أن 100% من أحداث الفيلم متوقعة بالكامل، لكن المتعة مش فى اكتشاف أحداث جديدة، بقدر ما بتكون فى الإستمتاع بجرعة من الأكشن ومشاهد المطاردات وتبادل إطلاق النار، وغيرها من الحاجات اللى متعودين عليها فى النوعية دي من الأفلام.

لو ماكونتش شوفت الأجزاء السابقة من سلسلة xXx هاتقدر تتابع فيلم اليوم بسهولة، لكن بننصحك بمتابعة السلسلة علشان تزود متعتك للنهاية، ولازم هنا نقول أن صناع الفيلم قدروا يوازنوا بين إمتاع المتابعين القدامى للسلسلة وبين المتابعين الجدد، اللى نعتقد أن كتير منهم ممكن يدور على الأجزاء السابقة ويبدأ فى مشاهدتها.

xXx: The Return of Xander Cage من تأليف إف. سكوت فريزر وإخراج دى.جى كاروسو وبيشارك فان ديزل البطولة كونر مكروجر و  روبي روز و توني جا  و صامويل جاكسون.

الفيلم بيحكي عن العميل السري إكساندر كايج واللى بيرجع تاني لساحة العمل السري علشان يكتشف سر سرقة جهاز غامض إسمه (صندوق باندورا)، والقادر على التحكم فى الأقمار الصناعية فى العالم وتوجيهها كأسلحة قاتلة ضد أفراد أو منشأت عامة وخاصة، الأمر اللى بيضع الإدارة الأمريكية أمام تحدي صعب، وبيكون أمام (كايج) حل واحد هو تكوين فريق من أفضل المقاتلين لاستعادة (صندوق باندورا).

معلومة على الطاير: الجهازالمدمر فى الفيلم واللى أطلق عليه إسم (صندوق باندورا) نسبة لأسطورة يونانية قديمة عن صندوق بيحتوي كل الشرور البشرية زي الجشع والطمع والغيرة والحقد.. وغيرها.

طبعا وزي ما أحنا عارفين، الخيط الدرامي الواهي بيكون مجرد مدخل لتقديم جرعة مكثفة من مشاهد الأكشن  والمطاردات وحتي الإشتباكات بالأيدي وتبادل قذف القنابل اليدوية فى مشهد مميز، لكن أفضل مشاهد الفيلم فى رأينا كانت مشهد المطاردة بالقوارب البحرية واللى كان مميز بدرجة كبيرة.

الكفاءة الجسدية العالية لفان ديزل كانت واضحه خلال أحداث الفيلم، وتم الأعتماد على شهرته الواسعة فى النوعية دي من الأفلام علشان يحقق الفيلم نجاحه، بالأضافة لاعتماده على سلسلة قوية بينتمي لها، لكن فى رأينا الفيلم كان أضعف حلقات السلسلة على صعيد التمثيل أو حتي الحوار.

بما أننا بنتكلم عن الحوار… الحوار كان فيه كتير من الجمل الأعتراضية الساخرة، واللى فى رأينا مش بتعجب غير جمهور المراهقين المتابعين للسلسلة واللى عاوزين يشوفوا بطل أمريكي خفيف الظل ومتبجح بيضرب الأشرار وبيسخر منهم! ودى من الأمور اللى عابت الفيلم فى رأينا.

مين ممكن يعجبه الجزء الأحدث من سلسلة xXx ؟ المشاهدين من سن 12 الى 20، وعشاق فان ديزل، ومحبي أفلام الأكشن اللى كلها ضرب وخناق وتبادل أطلاق نار بدون استراحة الا فيما ندر.. وطبعا متابعي ومحبي السلسلة من البداية هايعجبهم الفيلم.

علشان تبقي عارف:

• الفيلم بيتعرض فى أكثر من 3500 شاشة سينما حول العالم!
• ميزانية الفيلم 85 مليون دولار، وخلال الأيام الأولي من عرضه حقق حوالى 70 مليون دولار!
• تم طرح الفيلم فى مصر قبل يومين من طرحه فى الولايات المتحدة!