Zombieland: Double Tap : فيلم تقليدي بممثلين غير تقليديين!
لو انت مخرج مميز، وقدامك فيلم بقصة مكررة، وعاوز تعمل منه فيلم قوي.. الحل ايه؟ الحل انك تستعين بطاقم تمثيل مختلف. وهو ده اللي عمله روبن فلايشر مع فيلم Zombieland: Double Tap
الفيلم بيحكي عن مجموعة من الأشخاص المختلفين تماما من حيث طباعهم وشخصياتهم، لكن مواجهة مجموعة من الزومبي بتغزو أمريكا بتجبرهم على محاولة التجانس مع بعض علشان يظلوا على قيد الحياة.
قصة الفيلم لا جديد فيها، والفيلم بينتمي لفئة أفلام الزومبي المشهورة، واللي مش بنشوف فيها غير مجموعة أشخاص بتحاول تفضل عايشة، لكن كاست التمثيل هو اللي كان مختلف. وخاصة مع مشاركة ممثلين زي ايما ستون و وودي هاريلسون و وجيسي ايزنبرج وغيرهم.
والجميل أن كل واحد من فريق العمل كان له شخصيته الخاصة اللي قدمها من خلال شخصيته في الفيلم، وحسينا في كتير من المشاهد أن طبيعة الشخصيات دي نفسها في الحقيقة بتفرض عليهم نمط أداء معين، ويحسب للمخرج روبن فلايشر انه ترك المساحة والفرصة للممثلين علشان تقدم شخصياتها في الفيلم مع بعض التماس مع شخصياتها الحقيقية.
إخراج مشاهد الأكشن في الفيلم كان مميز لكن بعض مشاهد الزومبي والمكياج والخدع السينمائية اللي ترافقت مع مشاهدهم كان ممكن تبقى أفضل وواقعية أكتر. لكن بشكل عام وبالمقارنة مع أفلام الزومبي الفيلم كان مستواه جيد.
باختصار.. فيلم Zombieland: Double Tap تشوفه لو انت متعود وبتحب أفلام الزومبي وعاوز تشوف قصة تقليدية عنهم مع فريق تمثيل مش تقليدي ومخرج عاوز يعمل من الفسيخ… شربات