Zoolander2 : جزء جديد لفيلم عن عالم الأزياء

مع معرفتنا بانتاج جزء تاني من سلسلة افلام zoolander ومع الفارق الزمني الكبير بين الفيلمين، حطينا ايدنا على قلبنا واصبحنا فى قلق شديد من مستوي الفيلم الجديد، لان اللى احنا عارفين عن الاجزاء التانيه من الافلام انها فى الغالب مش بتكون بنفس قوة الاجزاء الاولى، وخصوصا فى الافلام الكوميدية واللى بتحتاج دايما تكون طازجه ومتوائمة مع متطلبات السوق السينمائى المتجددة دائما خصوصا فى الافلام الكوميدية… للاسف الفيلم ماخيبش توقعاتنا وجاء فى مرتبة اقل بكتير من الجزء الاول.. واقل حتي من اي فيلم كوميدي شوفناه مؤخرا.

من بطولة و اخراج بين ستيلر وبطولة بينوبلي كروز و اوين ويلسون بنشوف قصة زولاندر وهانسل اللى بيقرروا العودة من جديد لمجال عروض الازياء بعد انقطاع حوالى 10 سنين عن مزاولة المهنة، لكن الامور مش بتمشى معاهم بسهولة بعد مابيكتشفوا ان فيه مؤامرات كتيرة بيتم تدبيرها علشان تمنعهم من العودة من جديد للمجال.

الحقيقة ان القصة مكانتش قوية زي ما توقعنا، وكانت مجرد غطاء تمويهي لتمرير جرعة الكوميديا اللى الفيلم عاوز يمررها، والحقيقة احنا ماعندناش مشكلة مع ده فى حالة ان الكوميديا تكون قوية ومختلفة، لكن فى حالة الجزء الثاني من zoolander الكوميديا كانت سيئة جدا.. مفتعلة ومبنية على الايفيهات بأكتر من اعتمادها على المواقف الحقيقية الكوميدية، وده افقد الفيلم متعته وافقدنا اي قدرة على الانحياز للفيلم او الوقوف فى صفه كتر من كده.

الكلام عن الموسيقي التصويرية او باقى عناصر الفيلم بيكون قليل جدا فى حالة الافلام الكوميدية لان التركيز الاساسى مش بيكون عليها ، لكن ده مايمنعش اننا لاحظنا بعض المشاهد الجميلة بصريا واللى التصوير قدر يكون متميز فيها، لكن زي ما قولنا التركيز الاساسى للفيلم كان على صعيد الكوميديا والايفيهات، ورغم التركيز ده جت النتيجة فى النهاية مخيبة للامال.

بنعتقد ان الاعتماد على الجميلة بينوبلي كروز فى الدور النسائى كان اختيار موفق من الناحية التجارية خصوصا مع الايفيهات الجنسية اللى تم الاعتماد عليها فى جزء كبير من دور (كروز)، لكن على صعيد مستوي الفيلم او الاداء التمثيلي كان من الواضح ان (بينوبلي) اختيار خاطىء تماما، لكن زي ما قولنا الاحداث والقصة كانت مُهملة تماما على حساب الكوميديا اللى مكانتش موجوده بالقوة او الشكل اللى كنا نتوقعهم.

اخر كلامنا؟ استنوا zoolander2 فى الفضائيات وماتضيعوش وقتكم فى فيلم اقصى حاجه ممكن تخرجوا بيها منه هى بعض الابتسامات هنا وهناك على بعض المشاهد والايفيهات!