أخر ديك فى مصر: محمد رمضان ينتصر للمرأة!
من فترة طويلة كان نفسنا نتكلم عن التجربة السينمائية للنجم محمد رمضان.. الشاب اللى قدر يخالف توقعات معظم الناس بالفشل، ويثبت نفسه فى عالم الفن، ويقدم مجموعة من الأفلام فى منطقة هو وحده المسيطر على تفاصيلها وعارف أغوارها كويس.
محمد رمضان المولود فى 1988 كان بيتوجه له انتقادات كتيرة فى الفترة الماضية إنه حصر نفسه فى أدوار الأكشن اللى بتظهره كبلطجي.. محمد واجه انتقادات كتيرة بخصوص الأفلام اللى قدمها مع المنتج محمد السبكي، ولأننا لو أختلفنا على قوة أفلام محمد رمضان مش هانقدر نختلف على ذكاؤه الفني، فمن الواضح أن رمضان بيحاول يفتح سكك جديدة ويكتسب أرض جديدة ويعمل نقلة نوعية فى الجمهور اللى بيتابع أفلامه، علشان كده بدأ يقدم حاجه جديدة بعيدة عن أفلام البلطجة والأكشن، وهى الأفلام الايت الكوميدي.
فيلم أخر ديك فى مصر من تأليف أيمن بهجت قمر، وإخراج عمرو عرفه وبطولة مي عمر وهالة صدقي وإنجي وجدان وملك قورة.
الفيلم بيحكي عن الشاب علاء الدين، أو محمد رمضان، واللى بيتعرض لحادثة أثناء رحلة فى النيل، الأمر اللى بيجعله أخر رجل متبقي من عائلة الديك اللى بيتبعها، ومن هنا بتبدأ مجموعة كبيرة من المواقف الكوميدية مع نساء العائلة.
لأن مستوي الكتابة والأخراج فى الفيلم متميزين، كان لازم تكون النتيجة أن مستوي الكوميديا فى الفيلم يكون جيد جدا ومتميز، لكن فى رأينا أن محمد رمضان لسه مش متعود على تأدية الأدوار الكوميدية بنفس القوة اللى بيقوم بيها بأدواره التانيه، إحنا عارفين أنه قدم قبل كده فيلم واحد صعيدي واللى كان برضو فيلم كوميدي، لكن شتان بين كوميديا واحد صعيدي وبين كوميديا أخر ديك فى مصر.. الفرق بين الفيلمين زي الفرق بين الفندق الخمس نجوم والفندق النجمة الواحدة! وطبعا الفرق ده كان فى صالح أخر ديك فى مصر.
مستوي الديكورات فى الفيلم كان متميز، وكان واضح الفخامة والبذخ الإنتاجي، لكن مستوي الموسيقى التصويرية كان أقل بكتير من الديكورات، وبشكل عام مش بنتوقع كتير من الموسيقى والديكورات لما بيتعلق الأمر بفيلم كوميدي خفيف فى موسم الأجازات.
من الواضح أن الفيلم بينتصر للمرأة، وبيعرض تحول شخصية محمد رمضان من كاره للمرأة، أو حتي عرضة لمقالب بتخليه يظهر فى شخصية عدو المرأة، لشخص محب للأنثي وبيقول : المرأة كالمظلة تحميك من المطر إذا وضعتها فوق رأسك، وده فيه انتصار كبير للمرأة، ومن الواضح أن دي كانت رسالة الفيلم، بالإضافة للكوميديا فيه.
أخر ديك فى مصر فيلم كوميدي لايت برسالة بسيطة ومباشرة، ننصح بمشاهدته فى موسم الأجازة ببال رايق وبدون توقعات مسبقة كبيرة.
